A Escola Politécnica Superior de Lugo celebra a festividade de San Cidre con conferencias e entrega de premios

A Escola Politécnica Superior do campus de Lugo celebra a festividade de San Cidre, patrón dos enxeñeiros agrónomos, cun programa de actos que se desenvolverá este venres 14 a partir das 18:00 horas na Sala de Xuntas deste centro universitario.
O programa comezará coa conferencia ‘O Xurado de Expropiación de Galicia (XEG) e o Enxeñeiro Agrónomo nos expedientes de expropiación’ a cargo do presidente do XEG, Manuel González Sarria. A continuación, o decano do Colexio Oficial de Enxeñeiros Agrónomos de Galicia, Víctor Tello Calvo, reflexionará sobre cal é a misión do colexio que el dirixe.
Xa a partir das 19:00 horas procederase á entrega dos premios aos mellores proxectos de fin de carreira, así como dos diplomas e insignias a todos os recén titulados nas convocatorias de Proxectos Fin de Carreira dende abril de 2009 a febreiro de 2010.
Nesta entrega estarán o vicerreitor de Coordinación do Campus de Lugo, Carlos Herrero; o director da Escola Politécnica Superior, Javier Bueno; e o decano e o secretario do Colexio Oficial de Enxeñeiros Agrónomos de Galicia, Víctor Tello e Pedro Calaza.