Os directores dos máis importantes medios de comunicación latinoamericanos danse cita na USC

Os máximos representantes do xornalismo latinoamericano atópanse estes días en Santiago para asistir ao Congreso de Análise sobre Latinoamérica ‘Construíndo Eurolat. As relacións de Latinoamérica e a Unión Europea’, un encontro organizado polo Grupo Diariocrítico e Prestomedia e dirixido polo xornalista Fernando Jáuregui.
A inauguración tivo lugar este luns no Colexio de Fonseca nun acto presidido polo titular do Goberno galego, Emilio Pérez Touriño, e que contou ademais coa presenza do reitor Senén Barro; do director do Grupo Diariocrítico, Fernando Jáuregui; do presidente europeo da Asemblea Parlamentaria Euro-Latinoamericana, José Ignacio Salafranca; e do director de Estratexia de Medios de Telefónica, Carmelo Calvo. Fernando Onega foi o encargado de conducir o acto.
Previamente á apertura oficial, os asistentes ao congreso reuníronse co reitor compostelán na Biblioteca América do Colexio de Fonseca para coñecer da súa man a historia da Universidade que os acolle.
Nesta cuarta edición, que se desenvolverá enteiramente na Facultade de Ciencias da Comunicación, participan setenta xornalistas de 25 países -entre eles os directores dos catorce xornais máis importantes de América Latina-, embaixadores en Madrid e na UE, directores de medios de comunicación galegos e españois e representantes políticos de gran experiencia internacional.