Un congreso de Enxeñaría gráfica en Lugo será en xuño o foro de encontro para profesionais na Escola Politécnica Superior

O Congreso Internacional Conxunto de Enxeñaría Gráfica de INGEGRAF e de ADM que reunirá en Lugo a máis de 200 profesionais do 10 ao 12 de xuño de 2009 ten como principal obxectivo converterse nun foro de encontros entre profesionais que propicie o intercambio de experiencias científicas e profesionais no ámbito da Enxeñería Gráfica e das áreas de coñecemento relacionadas co deseño.
Durante o evento trataranse diversas liñas de traballo, tales como a simulación e a realidade virtual, a topografía, o procesamento dixital da imaxe ou cartografía, entre outras, destacando sempre a importancia da implantación das novas tecnoloxías en cada unha das disciplinas, como un soporte fundamental para a comunicación e o deseño.
Ademais, exporanse novos retos relacionados coa docencia en liña, dos congresos virtuais ou a normalización de plataformas de CAD en función do intercambio de información gráfica dixital. A USC elixiu o Campus de Lugo para a realización deste congreso, co fin de desenvolver un programa de visitas culturais paralelo á programación oficial, que permita aos congresistas coñecer a Galicia interior.
O congreso presentárono en rolda de prensa o vicerreitor de Coordinación do Campus de Lugo, Carlos Herrero; o director do departamento de Enxeñaría Agroforestal da EPS, Juan Gabriel Álvarez; e o presidente, vicepresidente e secretario do Comité Organizador do evento, Eduardo Zurita, Carlos Alvarez e Manuel Marey, respectivamente.