Remata o prazo para participar nunha nova edición do Concurso de Ideas Empresariais Innovadoras da USC

O prazo para participar no XI Concurso de Ideas Empresariais Innovadoras da USC rematará o vindeiro venres 28. Con esta iniciativa, a Universidade de Santiago premia as mellores ideas, orixinais e innovadoras, susceptibles de converterse en proxectos empresariais a curto e medio prazo.
A iniciativa diríxese a todos os membros da comunidade universitaria galega e a todas as áreas de coñecemento. Outorgaranse cinco premios de seiscentos euros valorándose a viabilidade da idea, o carácter innovador, o grao de madurez e a posible aplicación das políticas de igualdade.
A inscrición no certame realizarase de forma telemática, cumprimentando o formulario que aparece na páxina web de Uniemprende. Así mesmo, poderase participar imprimindo o documento en liña e entregándoo nos rexistros dos Campus de Santiago e Lugo. Organizado pola USC, o concurso conta coa colaboración das Consellarías de Traballo e de Innovación e Industria.