A USC lidera a produción científica do conxunto do Sistema Universitario de Galicia con 5.383 documentos publicados entre 2002 e 2006

A Universidade de Santiago lidera a produción científica do conxunto do Sistema Universitario de Galicia (SUG) con 5.383 documentos publicados nas revistas de investigación máis prestixiosas do mundo entre os anos 2002 e 2006. Este indicador, sumando as cifras das tres institucións galegas, ascende 9.044 documentos, dos que 2.954 proceden de investigadores da universidade viguesa e 1.380 da de Coruña. Os datos despréndense do informe Evolución da produción científica do SUG nas bases de datos ISI 2002-2006 elaborado polo Consorcio de Bibliotecas Universitarias de Galicia (Bugalicia) e inclúe artigos, cartas, material editorial, revisións ou notas, entre outros.
No período analizado constátase que a produción científica das universidades galegas representa o 76,5 por cento de toda a comunidade autónoma, que rexistra no seu conxunto 11.818 documentos publicados, agrupando as publicacións do sistema sanitario, centros asociados ao CSIC, organismos públicos de investigación, da empresa privada, da administración e doutros centros de investigación. Á vista deste resultados o Bugalicia conclúe que as entidades de ensino superior galegas “seguen a ser a locomotora da investigación na comunidade”.
As áreas nas que a USC aglutina unha maior capacidade produtiva son Química, onde contabiliza 1.528 documentos; Medicina, con 1.259; Bioloxía Molecular, Celular e Xenética, 825; Física e Ciencias do Espazo, 798; e Bioloxía Vexetal e Animal e Ecoloxía, con 488 documentos publicados nos cinco anos que comprende este estudo.
Para a elaboración do informe, o Consorcio botou man das bases de datos de Thompson-ISI, o Instituto para a Información Científica especializado na análise de citación ou factor de impacto de milleiros de revistas de todo o mundo. Á súa vez, a ferramenta empregada para a análise foi a bibliometría, disciplina que permite coñecer a estrutura, dinámica e evolución da actividade científica.