Comeza o curso de especialización en Unidades de Críticos

O curso de especialización en Unidades de Críticos iniciará este xoves 16 a súa programación académica cun acto de inauguración no que está prevista a asistencia do vicerreitor de Oferta Docente e Espazo Europeo de Educación Superior, Máximo Pló; a directora do curso, a profesora Amalia Puga; o xerente do Complexo Hospitalario Universitario de Santiago (CHUS), Jesús Caramés; a directora de Enfermaría do Complexo, Begoña Freire; o director Médico, José Rubio; o coordinador da Área de Docencia, José R. Fernánez; e o director do Departamento de Medicina, José Ramón González Juanatey. Esta sesión celebrarase a partir das 18:00 horas na Aula 2 do CHUS.
Esta primeira xornada incluirá ademais a celebración dunha mesa redonda sobre a estrutura, organización, calidade e humanización das Unidades de Críticos. Moderada pola profesora Amalia Puga, nela analizaranse as achegas dos distintos servizos implicados nestas unidades, tales como urxencias, coronarias, coidados intensivos, reanimación, doazón e transplantes, hematoloxía ou neonatoloxía, entre outros. A próxima cita do curso xa será no mes de febreiro de 2009, cando se desenvolve o módulo 1, dedicado á investigación en enfermaría.