Os alumnos de IV Ciclo Universitario celebraron o fin de curso afirmando ter aínda máis ganas de seguir aprendendo

O IV Ciclo Universitario clausurouse este venres no Colexio de Fonseca nun acto no que os propios estudantes manifestáronse satisfeitos co desenvolvemento dun programa formativo idóneo para “alimentar a súa necesidade de crecemento persoal” ao tempo que espertar novas ansias por seguir aprendendo.
Presidido polo vicerreitor de Oferta Docente e Espazo Europeo de Educación Superior, Máximo Pló, no evento tamén participaron o director do IV Ciclo, Manuel Botana Agra; o director xeral de Acción Social, Xosé Bieito Seara; o padriño da promoción, o profesor asociado do Campus de Lugo Roxelio Pérez Moreira; e o alumno de quinto curso deste ciclo universitario no Campus de Lugo, Nilo Arias Gómez.
Na clausura, este último subliñou á importancia desta iniciativa para as expectativas persoais dos maiores de 55 e solicitou á USC un idéntico recoñecemento do profesorado do IV ciclo co resto do persoal docente, a ampliación da oferta formativa e a posibilidade de escoller as materias por parte do alumnado.
Manuel Botana e Roxelio Pérez sumáronse a estas reclamacións, ante o que Máximo Pló lembrou que estes son xa obxectivos que Universidade de Santiago está a estudar actualmente e que se levarán a cabo no futuro. Ademais, o vicerreitor destacou que a Universidade de Santiago xa ten previsto elaborar unha oferta de formación continua que permita aos seus alumnos seguir estudando ao longo da súa vida.
Pola súa banda, Xosé Bieito Seara afirmou que xa “é tempo das persoas” e, polo tanto, “dos nosos maiores”, apuntando que a Xunta de Galicia está investindo cada vez máis neste colectivo. Ao longo da cerimonia entregáronse os diplomas a todos os que acadaron o Graduado Sénior durante o curso 2005-2006 e procedeuse á imposición de insignias aos alumnos da sexta promoción de Graduados Superiores Sénior.
O V Ciclo UniversitarioCon máis de 230 matriculados, 150 en Santiago e 80 en Lugo, o IV Ciclo Universitario é un programa formativo dirixido a maiores de 50 anos con independencia do seu nivel formativo. Estes estudos, que existen na Universidade de Santiago de Compostela dende o curso 1997-1998, teñen por obxecto promover a incorporación destas persoas aos estudos universitarios, favorecendo a súa integración e participación en procesos formativos que resposten ás necesidades e expectativas deste colectivo social.