Nace o banco de recursos didácticos para aulas hospitalarias ‘A maleta de emerxencia pedagóxica’

A ‘Maleta de emerxencia pedagóxica’ é un banco de recursos para aulas hospitalarias creado baixo o marco dun proxecto de aprendizaxe-servizo (ApS). Así o definen os seus coordinadores, Yésica Teijeiro Boo, Tania Caamaño Liñares e Jesús Rodríguez Rodríguez.  A través da colaboración entre as materias de Pedagoxía Hospitalaria e Deseño e avaliación de materiais didácticos do último curso de grao en Pedagoxía da USC, neste proxecto tomou parte todo o alumnado seleccionando recursos educativos dirixidos a aulas hospitalarias. O resultado é un banco de recursos que “organiza, clasifica e difunde todo o material tratado”. No seu desenvolvemento tamén colaborou a Aula Hospitalaria do Complexo Hospitalario Universitario de Santiago de Compostela.

Na actualidade a web conta con recursos organizados por destinatarios (ordenados por idades, atendendo ás franxas comprendidas entre 0-6, 6-12 e 12-16, así como para profesionais e familias), videoxogos e aplicacións, contos e libros, blogues, así como páxinas web ou películas e documentais, entre outros recursos. Ademais do material específico, “a intención deste proxecto é que en futuros cursos académicos a Maleta siga medrando coa implicación do novo alumnado que curse as materias, achegando o seu punto de vista para actualizar e ampliar os contidos deste banco de recursos comunitario”, explican os investigadores.

Algúns dos recursos contan con distintas opcións (como estar dispoñibles en distintos sistemas operativos), ademais de que a localización de material tamén se pode realizar a través da ferramenta de busca utilizando os criterios que nos achegan distintas posibilidades á nosa consulta. As persoas interesadas contan cun vídeo explicativo que mostra as distintas posibilidades de interacción coa web.