A Escola Politécnica entrega este xoves os premios do II Concurso de Traballos Fin de Grao sobre Enxeñaría e Muller Rural

A Escola Politécnica Superior de Enxeñaría do Campus Terra da USC acollerá este xoves, a partir das 12.00 horas, o acto de entrega de premios do II Concurso de Traballos Fin de Grao sobre Enxeñaría e Muller Rural. A vicerreitora de Servizos Universitarios do campus de Lugo, Carme Silva Domínguez, presidirá esta sesión, no marco da que a directora xerente de Mar de Frades, a enxeñeira agrónoma egresada do campus lugués Patricia Fandiño, ofrecerá un relatorio sobre a súa actividade profesional.

A alcaldesa de Lugo, Lara Méndez; a deputada provincial delegada da área de Promoción Económica e Social, Sonsoles López Izquierdo, e a profesora da USC e presidenta da Comisión de Igualdade de Xénero da Escola Politécnica Superior de Enxeñaría, María Dolores Fernández Rodríguez, tamén intervirán na celebración deste acto de entrega de premios ás persoas autoras dos traballos de fin grao mellor valorados polo xurado do certame.