O Servizo de Deportes da USC mantén aberta a inscrición na súa programación para o curso 2019-2020
O Servizo de Deportes da USC comezou o 1 de setembro o novo curso deportivo 2019-2020 coa apertura na web do prazo de inscrición nas distintas actividades programadas para o próximo o exercicio académico nos campus de Santiago de Compostela e de Lugo. Todas as instalacións abrirán no seu horario ordinario desde o luns 2 de setembro, agás a piscina, que o fará a partir do día 11. Aínda así, a web do Servizo de Deportes da USC permitirá xa a partir deste primeiro de setembro facer reservas, abonos, bonos e pases para usuarios de práctica libre, así como a inscrición na actividade atletismo-programas.
A oferta de actividades e escolas deportivas do Servizo de Deportes da USC para o curso 2019-2020 xa se pode consultar na web da USC, onde tamén se pode visualizar o calendario da programación xa deseñada, que podería ser susceptible dalgún tipo de variación en función da demanda rexistrada.
Os cursos de verán de tenis e actividades acuáticas abrirán a programación do novo curso deportivo do Servizo de Deportes da USC ao longo do mes de setembro, período durante o que tamén se volverán celebrar unhas xornadas de portas abertas. Así, día 17 ao 30 de setembro, todas as persoas interesadas poderán coñecer e familiarizarse de balde cos distintos programas ofrecidos, como coas instalacións deportivas nas que se desenvolven, antes de formalizar a súa matrícula.
A programación perfilada polo Servizo de Deportes da USC para o curso 2019-2020 dá continuidade ás escolas deportivas, ligas e competicións universitarias que se viñan desenvolvendo ao longo dos últimos anos. Trátase dunha oferta ampla e variada que se desenvolverá nos campus de Santiago e de Lugo, aínda que cada sede universitaria presenta un programa deportivo propio.
O campus de Lugo oferta para o vindeiro curso sesións de adestramento de fútbol sala mixto, voleibol; G.A.P., ioga, mantemento+aerobic+step, pilates, running, zumba, e, entre outras, ximnasia de mantemento. A programación do Servizo de Deportes da USC nos campus de Compostela é máis ampla e inclúe entre as actividades deportivas xadrez, running, sendeirismo, atletismo, mellora condición física, pilates, ximnasia de mantemento, ximnasia terapéutica, G.A.P.+tono, zumba e aerobic+step. Deportes como o tenis, triatlón, así como adestramentos de balonmán, fútbol sala feminino, voleibol, autodefensa, ioga, taekwondo, tai-chi, kungfu, judo, karate, mindfulness, aquagym, natación (adultos, nenos, pre e post-parto, maiores, terapéutica), tamén figuran no programa do Servizo de Deportes da USC.
As persoas interesadas en acadar máis información respecto ao novo curso deportivo do Servizo de Deportes da USC poden acceder á súa web ou tamén facer as súas solicitudes o suxestións a través dos enderezos de correo electrónico deporsec [at] usc.es (deporsec[at]usc[dot]es) e servizodeportes.lugo [at] usc.es (servizodeportes[dot]lugo[at]usc[dot]es).