Un sistema de análise sensorial baseado no método QIM permite determinar a vida útil do pescado desconxelado
Un sistema de análise sensorial baseado nos esquemas do Método de Índice de Calidade (QIM) permite estimar a vida útil do pescado desconxelado, ao tempo que tamén achega elementos para examinar se o tempo de conxelación previo afecta á calidade sensorial do peixe unha vez almacenado a temperaturas de refrixeración, segundo recolle a investigación de doutoramento ‘Pescado conxelado: desenvolvemento e aplicación do Método do Índice de Calidade (QIM) a diferentes especies e estudo de hábitos de compra e consumo’ que vén de presentar María del Mar López García na Facultade de Ciencias do Campus de Lugo da USC.
O sistema de avaliación sensorial desenvolvido por esta enxeñeira agrónoma na súa tese, dirixida polos profesores da USC Ángeles Romero, Lourdes Vázquez Oderiz e Luis Ramil Novo, céntrase nas especies de peixe de maior interese comercial capturadas polos buques conxeladores de Galicia e sobre as que a López García desenvolveu e validou cun panel de catadores adestrados fichas e esquemas sensoriais baseados no método QIM.
As novas ferramentas achegadas por estas investigadora permiten estimar a vida útil de do pescado unha vez desconxelado, ao tempo que serven para advertir o deterioro das característica organolépticas do peixe conforme permanece máis tempo almacenado a temperaturas de refrixeración. Aínda así, esta evolución varía en función da especies de que se trate e da súa forma de presentación.
O estudo dos hábitos de compra e consumo de produtos pesqueiros frescos, conxelados e desconxelados entre a poboación e a relación destes comportamentos con factores socioeconómicos e demográficos centra outra das liñas de investigación recollidas por López García na súa tese de doutoramento, na que precisa que a metade das persoas que mercan e consumen produtos pesqueiros descoñecen de antemán esta situación.
Tribunal de tese e cualificación
A catedrática de Tecnoloxía de Alimentos da Universidade Politécnica de Valencia Ana María Andrés Grau, presidiu o tribunal encargado de avaliar a investigación presentada por María del Mar López García. O tamén catedrático de Tecnoloxía de Alimentos da Universidade Miguel Hernández de Elche José Ángel Pérez Álvarez e Manuel Vázquez Vázquez, profesor da área de Tecnoloxía de Alimentos da USC, completaron a composición deste órgano avaliador, que outorgou a máxima cualificación a esta tese de doutoramento.
