Unha investigación da USC, Premio ás Boas Prácticas Educativas en Privacidade e Protección de Datos Persoais

Persoal investigador da USC e do Consello Xeral de Colexios Profesionais de Enxeñaría Informática (CCII) acaban de ser recoñecidos  co Premio ás Boas Prácticas Educativas en Privacidade e Protección de Datos Persoais para un Uso Seguro da internet polos Menores, como consecuencia do estudo levado a cabo durante o pasado curso académico 2020-2021, en colaboración con UNICEF, sobre o Impacto da Tecnoloxía na Adolescencia.

Co devandito premio a Axencia Española de Protección de Datos pretende recoñecer o compromiso de persoas, institucións, organismos, entidades, organizacións e asociacións, públicas e privadas, que se distinguiron de maneira destacada polo impulso e difusión entre os menores de idade de boas prácticas para un uso seguro da internet, relacionadas fundamentalmente coa información persoal e co valor da privacidade.

Esta investigación contou coa participación dunha mostra de máis de 50.000 adolescentes e abordou temas como as consecuencias psicolóxicas asociadas ao uso problemático da internet e as redes sociais, o  ciberacoso, a posible adicción aos videoxogos ou ao xogo en liña. Como explica o director científico do proxecto, Antonio Rial  Boubeta, este  macroestudo “volve poñer a Galicia na vangarda” destes traballos.  “Non é discutible que temos un grande problema de saúde pública e as institucións deben apostar pola prevención a nivel comunitario”, explicou.