Sara Piñeiro gaña o sétimo certame de pintura CreArte coa obra ‘Holocausto’

Sara Piñeiro, alumna de Belas Artes de Pontevedra, gañou a sétima edición do certame de pintura CreArte coa obra ‘Holocausto’. Na mesma convocatoria Víctor Rodríguez Espiñeira, con ‘Estación’, foi recoñecido co premio accésit. Ambos repartiranse respectivamente 700 e 400 euros, dotación dos premios en metálico.

Impulsado pola Facultade de Ciencias Económicas e Empresariais da USC, ao certame presentáronse un total de 18 obras. O acto de entrega de premios celebrarase o próximo 5 de abril coincidindo coa festividade do patrón da Facultade, San Vicente Ferrer, no que tamén se inaugurará unha exposición temporal cos fondos artísticos deste centro. Este é unha das actividades incluídas nos actos conmemorativos do 50 aniversario dos estudos de Economía en Galicia.

Dende a súa apertura, a Facultade de Ciencias Económicas e Empresariais da USC sempre tivo un especial interese no fomento da arte galega, motivo polo que en 2011 puxo en marcha o certame CreArte. As obras premiadas nesta nova edición incorporaranse á colección artística do centro conformada por obras de ACisclo, Sucasas, Laxeiro, Quessada, Silverio Rivas, Conde Corbal, Camilo Otero ou Tomé, entre outras.

'Estación', de Víctor Rodríguez Espiñeira, premio accésit