A aceleradora do sector alimentario BFFood esperta interese entre os investigadores do campus de Lugo

A aceleradora vertical especializada no sector alimentario Business Factory Food (BFF), unha iniciativa promovida pola Xunta de Galicia a través do Instituto Galego de Promoción Económica (Igape), a Sociedade Xestora de Entidades de Investimento de Tipo Pechado (Xesgalicia) e da Axencia Galega de Innovación (GAIN), na que participa a USC xunto coas demais universidades galegas, entre outras entidades e empresas, presentou este martes a seu programa de actuación e as pretensións coas que bota a andar esta iniciativa no marco dunha sesión celebrada no edificio Cactus do campus de Lugo e na que participaron preto de 30 investigadores.

A profesora Elvira López Mosquera, adxunta á Vicerreitoría de Coordinación do campus de Lugo para Investigación, Transferencia e Innovación, deu a benvida a todos os participantes neste foro no marco dunha sesión na que tamén interviron como relatores o xerente da Business Factory Food, Javier Álvarez Osuna, e Juan Feijoo Casanova, da Área de Competitividade-Igape.

A BFF é unha aceleradora que busca solucionar retos do sector alimentario e da industria 4.0, a través de empresas en vías de constitución ou recentemente constituídas, ofrecendo para iso financiamento, infraestruturas, mentorización, coaching e formación. Para acadar este obxectivo, a BFF conta coa dinamización, xestión e coordinación do Clúster Alimentario de Galicia (Clusaga) e co apoio de grandes empresas tractoras do sector, como Grupo Calvo, Grupo Nova Pescanova, Adegas Martín Códax, Kiwi Atlántico, Cravo Food Factory, CLUN Cooperativas Lácteas Unidas, Quescrem e Torre de Núñez.

Esta nova iniciativa conta tamén cun elevado nivel de representatividade, xa que ademais das tres universidades galegas, tamén participan da Business Factory Food a Asociación Galega de Cooperativas Agrarias (Agaca), Anfaco-Cecopesca, o Instituto Tecnolóxico de Galicia (ITG) e a Fundación Empresa-Universidade Galega (Feuga). Todos os socios da BFF achegan coñecemento experto, infraestruturas e medios técnicos a disposición dos emprendedores para o desenvolvemento e avance dos seus proxectos.

Próxima presentación Santiago

O acto informativo da Business Factory Food programado no campus de Lugo terá tamén a súa réplica o vindeiro 8 de abril no edificio Cibus do campus compostelá. O director da Área de Valorización, Transferencia e Emprendemento da USC, José Luis Villaverde Acuña; o xerente da Business Factory Food, Javier Álvarez Osuna, e Juan Feijoo Casanova, da Área de Competitividade-Igape, serán os tres relatores que participarán na posta de largo da BFF entre a comunidade universitaria compostelá.

López Mosquera, entre Álvarez Osuna e Feijoo Casanova, no edificio Cactus do campus de Lugo