Elena Vázquez Cendón, premio María Josefa Wonenburger 2022

A decana da Facultade de Matemáticas da USC, María Elena Vázquez Cendón, recibirá o premio María Josefa Wonenburger 2022. A nova deuse a coñecer no último pleno da Unidade Muller e Ciencia da Xunta de Galicia, na que se tivo en conta a carreira de investigación e divulgación da matemática. “É o corolario a un traballo feito”, afirmou a profesora da USC logo de coñecer a nova da concesión. “Sinto moita alegría e gratitude”, sinalou.

O galardón, outorgado anualmente dende o ano 2007, distingue as mulleres de Galicia con traxectorias nos ámbitos da ciencia e a tecnoloxía, "dando valor á súa carreira e converténdoas en referentes". Neste senso, a decana de Matemáticas subliñou que o feito de que aparezan titulares en prensa con mulleres referentes no eido científico “é meter un gol dende a ciencia”. “Quen sabe se entre as mozas que agora estean a ler a nova do premio se atope unha próxima galardoada co premio Wonenburger”, engade. O premio será outorgado nun evento que terá lugar o vindeiro martes, día 20 de decembro, en Santiago de Compostela.

O xurado encomiou a carreira da doutora Vázquez Cendón, polas súas contribucións no estudo das leis de balance hiperbólicas e polo seu compromiso coa divulgación, coa súa presenza á fronte do Proxecto de Estímulo do Talento Matemático (Estalmat-Galicia) dende o ano 2021. María José Alonso Fernández, Alicia Estévez Toranzo, Mabel Loza García, Peregrina Quintela Estévez, Ofelia Rey Castelao,  María Inmaculada Paz Andrade e Victoria Lareu conforman a listaxe de nomes da USC que recibiron este recoñecemento en edicións anteriores.

Currículo

Profesora de Matemática Aplicada da USC, Elena Vázquez Cendón naceu en Ourense o 2 de marzo de 1966. En 1984, trasladouse a Compostela para estudar Ciencias Matemáticas, carreira na que se licenciou, graduou e doutorou. Dende 1997 é profesora titular do Departamento de Matemática Aplicada. Forma parte do grupo de investigación en Enxeñaría Matemática e da Sociedad Española de Matemática Aplicada (SEMA) dende a súa constitución, así como da Asociación Galega de Investigadores da Auga (AGAIA) e da Asociación Galega de Comunicación de Cultura Científica e Tecnolóxica DivulgAcción.

Coordinadora xeral, dende xullo de 2014 ata setembro de 2018, do programa de Estímulo do Talento Matemático (Estalmat-Galicia) para nenos e nenas de 12 a 15 anos, é tamén responsable do seguimento dos egresados e da conexión do proxecto coas STEM dende setembro de 2018 e presidenta de Estalmat-Galicia dende o 10 de abril de 2021. É membro do Centro de Investigación e Tecnoloxía Matemática de Galicia, así como coordinadora xeral do Máster en Matemática Industrial, impartido pola USC, UDC, UVigo, Carlos III e Politécnica de Madrid.

Participa, asemade, impartindo charlas e talleres en centros de Ensino Medio de Galicia tanto en temas de divulgación científica como de Muller e Ciencia, colaborando nos cursos 2015-16 e 2016-17 cos Programa Diana e Ada, respectivamente, a proposta da Secretaría Xeral da Igualdade da Xunta de Galicia. Vázquez Cendón é membro tamén do Plenario do Consello da Cultura Galega dende maio de 2018, así como da Sección de Ciencia, Natureza e Sociedade do Consello da Cultura Galega dende 2012 e coordinadora da mesma dende xullo de 2018. É membro da Unidade de Muller e Ciencia da Xunta de Galicia e forma parte do directorio de Referentes galegas.

O premio

María Josefa Wonenburger Planells (1927-2014) foi un nome clave no ámbito da álxebra. Doutora pola Universidade de Yale, fixo carreira docente en distintas universidades dos Estados Unidos e dá nome, dende o ano 2007, ao galardón co que o goberno autonómico recoñece as traxectorias de mulleres científicas que souberon adiantarse ao seu tempo e que abriron camiños a moitas outras.