As precipitacións rexistradas en Compostela ao longo de 2022 chegaron aos 1.726,7 litros por metro cadrado

A 31 de agosto tan só se levaban contabilizados 526 litros/m² de precipitacións en Compostela, sendo a referencia como ano máis seco o 2007 cun total de 1.200 l/m². “As previsións dun outono con poucas precipitacións causara alarma, pero como xa ten acontecido anteriormente nunha morea de ocasións as chuvias de outono viñeron ao rescate”, explica o director do Observatorio Astronómico Ramón María Aller, José Ángel Docobo, no resumo meteorolóxico correspondente a 2022 elaborado coa colaboración de Pedro Pablo Campo e Maximino Pardo. Nos últimos tres meses, rexistráronse 1.026 l/m², os cales unidos aos 175 l/m² de setembro completaron un total de precipitación en 2022, en Compostela, de 1.726,7 l/m², “algo que ao final do verán parecía imposible”, matiza o profesor Docobo. Ao final estivo a piques de acadarse a media anual dos 1.800 l/m².

“No ano 2000 aínda fora peor xa que nos últimos meses se chegaran a medir máis de 1.500 l/m². Neste finalizado 2022, o mes máis chuvioso foi decembro con 451,4 l/m², seguido de outubro (307,4) e novembro (267)”, relata. Pola contra, meses tradicionalmente chuviosos apenas achegaron cantidades notables: xaneiro (64,1 l/m²), febreiro (52,9), e maio (65,1).

É destacable a cantidade de chuvia rexistrada o 19 de decembro con 100,5 l/m², e tamén os 55 l/m² do día 23 do mesmo mes. En 15 días a precipitación superou os 30 l/m². Foron 181 as xornadas nas que choveu nalgún momento do día. Estas representan o 49,6%, se ben en 22 delas foi inapreciable (menos de 0,1 litros/m²). Sen contar estas últimas, serían por tanto 159 (43,6%).

Temperaturas

Xullo e agosto foron meses especialmente quentes. Das 21 xornadas nas que o termómetro superou os 30º, 19 delas pertencen a ditos meses. Destaca a máxima absoluta do ano acadada o 14 de xullo con 39º3, practicamente igual á de dous días antes (39º2). O 9 de xullo alcanzáronse os 36º4 e o día 13 do mesmo mes, 36º0. A mínima absoluta correspondeu ao 24 de xaneiro con -0º5. Tan só neste día e mais no 7 de marzo (-0º4) a mínima foi negativa.

A temperatura máxima máis baixa tivo lugar o día 8 de xaneiro con 10º8, mentres que os días 14 e 15 de xullo a mínima non descendeu dos 23º. A máxima do mes de decembro (17º0) tivo lugar o último día do ano, “curiosamente o mesmo que aconteceu en 2021, pero daquela a temperatura fora algo superior (20º8)”, afirma Docobo.

Insolación

2022 estivo na liña dos últimos anos, con máis horas de Sol con respecto á media das últimas décadas. En total, os heliógrafos do Observatorio Astronómico Ramón María Aller rexistraron 2.284 horas e 45 minutos, bastante por enriba da media (2.079 horas). O medido este ano supón un 52,2 % das posibles horas de insolación. Destacan os 108 días con máis de 9 horas e outros 79 nos que o Sol saíu en Santiago entre 6 e 9 horas. “Porén, foron 35 as xornadas (maioritariamente nos últimos meses) nas que o astro rei non se deixou ver pola capital de Galicia”, conclúe.