O campus de Lugo celebra o luns 10 de setembro unha xornada de benvida ao novo alumnado no auditorio de Veterinaria

O campus de Lugo da USC celebrará o luns 10 de setembro, a partir das 12.30 horas, no auditorio da Facultade de Veterinaria, unha xornada de benvida dirixida especialmente aos mozos e mozas que inicien os seus estudos de grao en Lugo, pero tamén aberta á participación do conxunto do alumnado da sede universitaria luguesa e demais membros da comunidade universitaria.

A vicerreitor de Coordinación do campus de Lugo, Montserrat Valcárcel Armesto ; o secretario Xeral de Universidades da Xunta de Galicia, José Alberto Díez de Castro; o deputado provincial Álvaro Santos Ramos, e a alcaldesa de Lugo, Lara Méndez, participarán no acto institucional, previsto para as 13.00 horas e ao que, entre outros, tamén asistirán os adxuntos á Vicerreitoría de Coordinación de Lugo para Investigación, Transferencia e Innovación, Elvira López Mosquera, e para Estudantes, Internacionalización, Cultura e Servizos, Jesús Varela Zapata. Esta xornada de benvida ao alumnado do campus constitúe tamén un marco acaído para que cada servizo do campus disporá dun espazo expositor no que informará ao alumnado da súa actividade e oferta formativa ou de lecer.

Biblioteca Intercentros, Área de Orientación e Inserción Laboral, Oficina de Cultura, Servizo de Deportes, Servizo de Participación e Integración Universitaria, Servizo de Relacións Exteriores, Normalización Lingüística, Centro de Linguas Modernas, Oficina de Igualdade de Xénero, Desenvolvemento Sostible, Residencia Universitaria Jesús Bal y Gay, Centro de Apoio Científico-Tecnolóxico (Cactus) ou a Oficina de Información Universitaria, darán a coñecer a súa diversa actividade. Xunto cos espazos propios da USC, tamén contarán cun espazo expositor Concello e Deputación de Lugo, Dirección Xeral de Xuventude e Banco Santander. De xeito paralelo a esta actividade informativa tamén haberá unha exhibición de baile latino, ao tempo que se poderán degustar uns petiscos.