A Asociación do IV Ciclo do Campus de Lugo coñece a riqueza cultural e patrimonial de Estremadura

Medio centenar de estudantes sénior integrados na Asociación de IV Ciclo do Campus de Lugo está gozar estes días dunha viaxe a Estremadura, no marco da que as 50 persoas participantes terán a oportunidade de coñecer de primeira man a riqueza cultural e patrimonial desta rexión.

A expedición universtiaria promovida pola asociación que preside Cristina Pérez comezou este itinerario cultural o pasado domingo, cando se desprazaron ata a localidade estremeña de Trujillo, para logo organizar visitas ás cidades de Mérida e Cáceres, así como á localidade de Guadalupe, pertencente á comarca das Villuercas e onde se atopa o santuario da Virxe de Guadalupe.

Logo de percorrer algúns dos enclaves patrimoniais e urbanos máis emblemáticos da provincia de Cáceres, a delegación universitaria luguesa fará este mércores unha última parada na localidade de Hervás, o centro administrativo e comercial da comunidade do Val do Ambroz, onde poderán pasear polas rúas do seu barrio xudeu para logo continuar a súa viaxe de regreso á capital luguesa.