Unha xornada analiza a revalorización de subprodutos agroforestais como ingredientes en cosméticos ecolóxicos
A Facultade de Química acolleu unha xornada sobre ‘Revalorización de subprodutos agroforestais como ingredientes en cosméticos ecolóxicos: sinerxías entre a investigación e a empresa’, organizada dende o Laboratorio de Investigación e Desenvolvemento de Solución Analíticas do Departamento de Química Analítica (LIDSA) da man da súa investigadora colaboradora Laura Rubio Lareu, responsable de calidade en i-Grape Laboratory. Esta iniciativa foi seleccionada polo Consello Social da USC, xunto con outras dez actividades máis, para recibir financiación a través do seu programa de axudas na convocatoria do ano 2023. A presente actividade contou cunha grande acollida por parte de estudantes, investigadores e público en xeral.
O encontro permitiu dar visibilidade e achegar á sociedade cun enfoque sinxelo e divulgativo tanto a investigación como os traballos de empresas en materia de cosmética e, concretamente, cosmética elaborada con produtos ou subprodutos ecolóxicos dotándoos dun valor engadido e innovación.
Nun primeiro bloque, a xornada integrárona charlas divulgativas sobre a investigación na análise de produtos cosméticos ou extractos naturais obtidos da revalorización de subprodutos agroalimentarios ou agroforestais e sobre a experiencia dunha empresa de produtos ecolóxicos. Este bloque rematou cunha mesa redonda sobre a visión da cosmética natural. Na segunda parte desenvolveuse un taller de cosmética natural que tiña como finalidade amosar a aplicación práctica e directa na vida real desta alternativa, impartido por socias da empresa Milhulloa Sociedade Cooperativa Galega.
