A conferencia anual de EUniWell avanza na renovación dunha axenda común do benestar
A Alianza Europea EUniWell, na que se integra a USC, desenvolve dende este xoves 10, na Universidade de Murcia, a Conferencia ‘EUniWell Showcase - Becoming a Voice for Well-Being’. A través deste foro que se estende ata o venres 10, a Alianza quere fortalecer a colaboración entre as institucións que a integran, así como visibilizar e poñer en valor os logros acadados na fase piloto do proxecto Erasmus+, que remata agora, nos eidos da investigación, a educación, a innovación e a participación cidadá no marco dunha axenda común do benestar. O reitor da USC, Antonio López, e a vicerreitora de Titulacións e Internacionalización, María José López Couso, encabezan a delegación da USC nesta conferencia que tamén servirá para dar a coñecer as oportunidades que se abren para a comunidade universitaria dentro do novo proxecto ‘EUniWell–Well-Being for our Futures (EUniWellWeFF)’. O reitor asiniu a adhesión da USC á EUniWell Declaration on Open Education.
O foro alberga a presentación dos resultados dos grupos de traballo EUniWell na fase piloto, destacando a súa contribución no seo das institucións que integran a Alianza; o lanzamento do ‘Marco Estratéxico de EUniWell para 2030’, que se presenta como folla de ruta para o desenvolvemento futuro da Alianza; así como diversas mesas redondas coas que se aspira a fomentar o intercambio de coñecemento e a inspirar a posta en marcha de novas ideas.
Contribución tanxible ao benestar
A USC é dende xaneiro de 2023 unha das once institucións universitarias que integran a alianza EUniWell, a Universidade Europea do Benestar, que co apoio da Comisión Europea persegue comprender, mellorar, medir e reequilibrar o benestar das persoas, as comunidades e a sociedade no seu conxunto en base a valores democráticos, inclusivos e de diversidade. A institución compostelá integrouse neste consorcio e sumouse á listaxe de nove institucións que xa formaban parte da alianza: Birmingham, Cologne, Florence, Konstanz, Murcia, Linnaeus University, Nantes Université, Semmelweis University e Taras Shevchenko National University of Kyiv. Coa incorporación da Universidade compostelá, EUniWell pasou a estar integrada por 330.000 estudantes e case 60.000 membros procedentes dos respectivos cadros de persoal das institucións que a compoñen.
EUniWell, unha das preto de medio cento de alianzas universitarias financiadas dende 2020 pola Comisión Europea ao abeiro do programa ERASMUS+, utiliza a fortaleza colectiva para dar forma ao futuro da educación superior en Europa situando o benestar no centro da súa actividade investigadora, docente e de intercambio internacional. Co seu enfoque no benestar, EUniWell responde ao convite do Consello da Unión Europea para que os estados membros adopten un enfoque horizontal, intersectorial e baseado no coñecemento para promover a 'Economía do Benestar'. En novembro de 2020, EUniWell entrou na súa fase piloto de tres anos durante os cales desenvolveu unha axenda común de investigación e docencia sobre o benestar, a nivel rexional, europeo e mundial.
