37 persoas inscritas no 1ª Concurso de Edición da Galipedia, unha iniciativa que pretende crear artigos de calidade en galego.
As comisións de normalización lingüística da Facultade de Matemáticas, da Facultade de Psicoloxía e da Escola Técnica Superior de Enxeñaría promoven esta iniciativa que pretende dar pulo á produción e á difusión de artigos de calidade contrastada en lingua galega na Galipedia (wikipedia en galego) e fomentar a participación de toda a comunidade universitaria nunha iniciativa de extensión do saber e do coñecemento en lingua galega.
Os obxectivos deste concurso son: promover a produción e a difusión de artigos de calidade contrastada en lingua galega na Galipedia e fomentar a participación da comunidade universitaria nunha iniciativa orientada á promoción da lingua galega e da cultura.
Poderán presentarse a estes premios os membros da comunidade universitaria da USC no curso académico 2023/2024.
As persoas interesadas en participar neste concurso deben:
- Antes do 31 de maio, inscribirse como participantes, a través do formulario accesible desde esta ligazón. A organización confirmará a inscrición ao enderezo electrónico que no formulario se indique como medio de contacto.
-
Editar na Galipedia un artigo ou un conxunto de artigos, ben creándoos de novo, ben mellorando de forma significativa algúns xa existentes. Esas edicións deben realizarse como persoas usuarias rexistradas na Galipedia, para que as contribucións individuais de cada participante sexan identificables.
-
Antes do 5 de setembro, presentar esas edicións ao concurso, seguindo o procedemento que se indica na epígrafe 5 das bases do concurso.
Os artigos, redactados en lingua galega, deberán encadrarse en calquera das tres seguintes áreas de coñecemento:
-
Psicoloxía
-
Matemáticas
-
Enxeñarías química, ambiental e informática, e intelixencia artificial
Unha mesma persoa autora poderá presentar a concurso artigos vinculados a unha ou a varias áreas de coñecemento.
Concederanse 6 PREMIOS, dous por área de coñecemento, repartidos do seguinte xeito:
-
Matemáticas.
Un primeiro premio de 350 € e un segundo de 150 € -
Psicoloxía.
Un primeiro premio de 350 € e un segundo de 150 € -
Enxeñaría química, ambiental e informática, e Intelixencia Artificial.
Un primeiro premio de 350 € e un segundo de 150 €
O prazo de inscrición remata o 31 de maio.
O prazo límite para a presentación do traballos remata o 5 de setembro de 2024.
A presentación realizarase a través do Rexistro Electrónico da Sede Electrónica da USC mediante o procedemento "Solicitude xenérica".
Como medio de identificación e sinatura deberán empregarse as credenciais como membro da comunidade universitaria.
No despregable correspondente ao órgano ao que vai dirixido deberase escoller “Servizo de Normalización Lingüística”.
No asunto da solicitude deberase consignar “I CONCURSO DE EDICIÓN DA GALIPEDIA” seguido da ÁREA DE COÑECEMENTO correspondente en que se vai participar e indicar no texto da solicitude os seguintes datos:
-
Nome e apelidos e DNI do participante
-
Teléfono e correo electrónico de contacto
-
Vinculación coa USC (PDI, Estudantes, PAS)
-
Área ou áreas de coñecemento ás que se presenta
-
Ligazón ao artigo ou artigos que presenta ao concurso