O Consello do Estudantado bota a andar en Lugo as súas xornadas de convivencia e formación universitaria
As Xornadas de Convivencia e Formación Universitaria organizadas polo Consello do Estudantado da USC botaron a andar este xoves 17, no Auditorio da Facultade de Veterinaria do Campus de Lugo. Trátase dunha iniciativa de dinamización estudantil que promove unha participación activa, responsable e formada na comunidade universitaria e que facilita ao estudantado a información necesaria para o seu exercicio activo. A segunda das xornadas desenvolverase en Compostela o vindeiro mércores 23 de outubro, onde se desenvolverá un encontro co equipo reitoral da USC.
“Queremos fomentar a participación do estudantado na Universidade e dar recursos e información para que poida intervir de xeito activo”, destacou Andrés Couso, presidente do Consello do Estudantado, no acto inaugural no que estivo acompañado pola vicerreitora de Estudantes e Cultura, Pilar Murias; o decano de Veterinaria, Gonzalo Rodríguez; a profesora Belén Caballo que interveu por videoconferencia; e por Diego López, integrante do comité organizador e o encargado de debullar parte do programa.
“Convivide moito”, dixo Pilar Murias ao centenar de estudantado asistente. “A USC débese a vós, ao que sodes vós, tedes a capacidade de influír no que é a USC”, subliñou a vicerreitora, quen lembrou que todo o traballo vivido xunto ao Consello do Estudantado conforma para ela “unha etapa chea de ilusión”. Pola súa parte o decano de Veterinaria lembrou que este tipo de iniciativas baseadas no fomento da participación na vida universitaria serven para “formar unha cidadanía comprometida”, elemento clave para o avance da sociedade. Finalmente, Belén Caballo destacou que este foro constitúe, ao igual que a Universidade, “un espazo de vida”.
Programa
No transcurso da xornada no campus lucense, tivo lugar un obradoiro de igualdade, xunto cun encontro co Valedor da Comunidade Universitaria. A sesión contou tamén con diversas actividades e formacións de carácter xeral e outras específicas, a escoller segundo os intereses do estudantado. En concreto, ofrecéronse accións competenciais sobre trámites burocráticos, metodoloxías participativas e traballo en rede, estratexias de negociación, estratexias para o estudo e recursos da USC, primeiros auxilios, conciliación dos tempos educativos cos tempos sociais e persoais e obradoiros de regueifa, oratoria ou comunicación e redes sociais.
As formacións teóricas abordaron cuestións relacionadas cos dereitos do estudantado, historia do movemento estudantil, infraestruturas e espazos dos campus, regulamento de avaliación e asistencia, vivenda e mundo laboral, métodos de participación universitaria, responsabilidade social e carreira investigadora.
Este encontro deseñouse coa vontade de que chegue ao estudantado de todos os centros universitarios, garantindo cinco pazas por centro, con prioridade para estudantes de 1º e 2º curso. O Consello do Estudantado sufraga os gastos de transporte Santiago-Lugo e Lugo-Santiago. Ademais, a participación recoñécese cun crédito ECTS en recoñecemento da formación recibida. Colaboran nesta iniciativa o Clube de Debate, ESN, AIC, Erguer, Iuris Galicia e Alumni USC.
