Un cento de deportistas participaron en Sar no Campionato 3x3 USC-Obradoiro
A pista central do Multiusos Fontes do Sar de Santiago acolleu este luns un total de 108 deportistas da USC que participaron no Campionato 3x3 USC-Obradoiro así como no de Triplas. Foron en total 22 equipos conformados por membros da comunidade universitaria, que verán recompensado o seu esforzo o vindeiro 12 de marzo na entrega de premios que terá lugar no decorrer do partido Obradoiro-Hestia de Menorca e ao que todas as persoas participantes no torneo 3x3 están convidadas.
Foron 4 os equipos femininos que xogaron este luns, co resultado do Sangrineta como gañador. Na categoría masculina competiron 18 equipos, resultando vencedor Guaposh. Ademais, de 6 deportistas que participaron no campionato de triplas mixto, foi Manuel Vicente Cachopas Gil Prates quen se fixo coa competición. Todos os resultados están dispoñibles na web de Deportes da USC onde tamén se pode acceder a imaxes dos distintos enfrontamentos disputados na pista do Multiusos.
Tanto o campionato 3x3 como o de triplas enmárcanse na colaboración que manteñen a USC e o Club Obradoiro cunha mesma vontade como é a de promover a práctica do deporte como un valor transversal e coincidente cos propios valores universitarios. A colaboración incide ademais na oferta de alternativas de prácticas deportivas a toda a comunidade universitaria da man da colaboración cos clubs do contorno universitario, ao tempo que se fomentan de hábitos de vida saudable.
Deste xeito, a USC intensifica a súa relación coas distintas entidades deportivas galegas co dobre obxectivo de fortalecer as xa existentes e tecer outras novas coa súa contorna.
