Nova oportunidade para que o alumnado preuniversitario coñeza e resolva dúbidas sobre a USC e os seus estudos

O alumnado preuniversitario que o desexe poderá coñecer de primeira man todo o que a USC lle ofrece así como resolver todas as súas dúbidas sobre a oferta docente e de servizos da Universidade compostelá nos seus dous campus. Será os días 14 e 15 de abril nos Encontros Virtuais na Zona USC, que chegan á súa sexta edición en formato videoconferencia no que os rapaces e rapazas poderán interactuar con profesorado e responsables de distintos servizos universitarios.

A páxina de acceso aos encontros é https://www.usc.gal/gl/encontros-virtuais e nela irase actualizando a información cos horarios e ligazóns en función do interese do alumnado, ben sexa académico ou de servizos.

Seis anos da iniciativa
Esta iniciativa botou a andar no ano 2020 por mor da pandemia que, naquela altura, impedía a realización de visitas presenciais do futuro estudantado. Logo do éxito acadado, dende o Programa A Ponte entre o Ensino Medio e a USC optaron por seguir organizando estes Encontros cunha periodicidade anual á que se suman milleiros de rapazas e rapaces que queren acceder á universidade.

Todas as persoas que así o desexen poden acceder á web dos Encontros e premer sobre as titulacións que máis lles interesen. Unha vez dentro, atoparán o horario establecido para as videoconferencias ás que poderán conectarse de balde e nas que persoal do centro en cuestión atenderá todas as cuestións formuladas. Ademais, dentro de cada área de coñecemento, pode accederse a información xenérica sobre as titulacións que abarca cada eido.

Ademais, o estudantado participante pode conectarse en liña co Servizo Universitario de Residencias, a Área de Cultura, o Servizo de Deportes ou o Centro de Linguas Modernas, entre outros, onde tamén serán respondidas as súas dúbidas, alén de poder visualizar material audiovisual que complemente a información ofrecida por videoconferencia.