Ciencias Económicas e Empresariais homenaxea o profesor Javier Rojo Sánchez

O que fora profesor da Facultade de Ciencias Económicas e Empresariais Javier Rojo Sánchez será protagonista o luns 29 dunha homenaxe no Salón de Graos deste centro a partir das 12.00 horas baixo a presidencia da vicerreitora de Estudantes, Cultura e Responsabilidade Socia, Dolores Álvarez Pérez.

Nunha sesión que pretende lembrar a relevancia do homenaxeado e á que asistirá a súa filla Nela Roja, o acto reunirá a testemuña de compañeiros/as, amizades e ex alumnado do docente falecido o pasado mes de outubro. Entre outros, intervirán o ex presidente da Xunta Emilio Pérez Touriño en representación dos docentes da Facultade; Pilar Murias Fernández, tomando a palabra en nome do alumnado ao que impartiu docencia; ou Jaime Barreiro Gil en representación das súas amizades. Tamén intervirán o director do Departamento de Economía Aplicada, Edelmiro López Iglesias; e a decana da Facultade, Emilia Vázquez Rozas.