Arranca a décimo terceira edición de XuvenCiencia para espertar a vocación científica dun cento de adolescentes
A décimo terceira edición do Campus de Verán XuvenCiencia, no que participan case un cento de adolescentes de terceiro e cuarto da ESO, primeiro e segundo de BAC e ciclos medios de FP, arrancou este luns e desenvolverase ata o sábado 5 en facultades, centros de investigación e laboratorios do Campus de Lugo da USC.
Como en anos anteriores, o programa inclúe obradoiros prácticos, visitas a centros de investigación da USC en Lugo e doutros puntos da contorna, así como diversas actividades deportivas e de ocio. O estudantado está acompañado en todo momento por monitorado científico cualificado —constituído por estudantes da USC, a partir dun programa específico deseñado desde a Oficina de Voluntariado do Campus de Lugo— e para os seráns e as noitiñas está previsto o programa Lumieira Acompaña, con propostas de lecer.
Os participantes integraranse en proxectos relacionados coas áreas biosanitaria, científica experimental, de ciencias sociais e de humanidades, que se desenvolverán coa guía de persoal docente e investigador e en diferentes centros, laboratorios e en espazos do Campus de Lugo da USC.
Entre as actividades propostas figuran obradoiros de xornalismo, de análises clínicas, investigación das causas da morte de animais, cociña molecular, a saúde, facer ciencias coas letras, monitarización ambiental, cultivo in vitro de árbores, robots, técnicas ópticas, patóxenos animais, ferramentas de ADN ou comportamento de materiais na construción.
