Recoñecido persoal experto do eido da psicoloxía social e ambiental e no estudo do Camiño de Santiago daranse cita en Santiago os días 9 e 10 de outubro nas I Xornadas do Camiño de Santiago desde unha perspectiva psicosocial.
Esta proposta innovadora impulsada polo Idega está dirixida pola profesora titular de Psicoloxía Social M. Mar Durán e polo catedrático de Análise Xeográfico-Rexional e director do Instituto de Estudos e Desenvolvemento de Galicia (IDEGA), Rubén Camilo Lois González, e conta co apoio da Axencia Galega de Turismo da Xunta de Galicia e o Centro de Estudos e investigacións turísticas (CETUR).
A xornada inauguraraa o xoves 9 ás 9.30 horas no Salón de Actos de Psicoloxía a decana da Facultade, María José Sampedro, e continuará cunha serie de relatorios centrados no contexto cultural e psicosocial do Camiño de Santiago. Nesa xornada intervirán, ademais de Mar Durán e Rubén Lois González; o catedrático de Historia da arte da Facultade de Xeografía e Historia da USC e director da Cátedra do Camiño de Santiago e as peregrinacións, Miguel Taín Guzmán; o profesor titular de Psicoloxía Social da Universidade do País Vasco, César San Juan; e o catedrático Emérito de Psicoloxía Social da Universidade de Barcelona, Enric Pol.
O día 10, as intervencións porán o foco en aspectos dirixidos a dinámicas sociais e diversidade e terá lugar unha mesa redonda sobre o futuro do Camiño. Contarase coa participación da profesora titular de Análise Xeográfico-Rexional da Facultade de Xeografía e Historia da USC e directora do CETUR, Lucrezia López; do director da Axencia de Turismo de Galicia da Xunta de Galicia, Xosé Manuel Merelles; do catedrático de Fundamentos de análise económica e membro do Comité de expertos do Camiño de Santiago, Melchor Fernández; a directora da Hospedería San Martin Pinario, M. Carmen Furelos Gaiteiro; e do ex presidente da Federación galega de asociacións de amigos do Camiño de Santiago, vicepresidente da agrupación de Asociacións de Amigos do Camiño de Santiago do Norte e presidente da asociación Abriendo Camino de Mondoñedo, José Luis Fernández Ansedes.