A comunidade universitaria recibe formación en materia de ciberseguridade

Ciberseguridade, ciberdelitos e ciberdelincuentes centraron a charla impartida polo inspector xefe de Policía, Santiago Reboiras, que tivo lugar este venres 3 no Centro de Estudos Avanzados da USC. Con esta actividade na que participaron representantes de facultades, escolas, centros de investigación, servizos e Consello do Estudantado preténdese ampliar a formación da comunidade universitaria no ámbito da ciberseguridade e promover a implantación de medios tecnolóxicos neste eido. 

Esta iniciativa engádese a outras xa promovidas dende a USC como a creación dun espazo web dependente da Secretaría Xeral con material didáctico sobre ciberseguridade que materializa o compromiso da institución coa seguridade dos datos que manexa e coa formación da súa comunidade.