A orquestra do Espazo de Cámara da USC rememora os seus cinco primeiros anos de existencia cun CD conmemorativo

Dende a súa posta en marcha no curso 2010-2011 conformaron a orquestra do Espazo de Cámara da USC máis de 200 estudantes da USC, ofrecendo 25 programas diferentes en algo máis de 30 concertos públicos aos que asistiron máis de 3.200 espectadores. Estas cifras fan balance dos cinco primeiros anos de actividade da orquestra universitaria, concibida inicialmente como un proxecto pedagóxico e cultural coa música como eixo fundamental.

Cando se cumpren os seus primeiros cinco anos de existencia, o Espazo de Cámara publica o dobre CD conmemorativo ‘Un lustro de historia’ a modo de testemuña do traballo desenvolvido ata o momento. En paralelo, a orquestra do Espazo de Cámara ofrecerá o vindeiro domingo 11, ás 20.00 horas na Igrexa da Universidade, o seu tradicional Concerto de Nadal con entrada de balde ata completar aforo. Tanto o CD como o programa do concerto presentárono este mércores en rolda de prensa a vicerreitora Estudantes, Cultura e Responsabilidade Social, Dolores Álvarez Pérez, o director do Espazo de Cámara da USC, Mario Diz, e o director da Área de Cultura da USC, Pablo Sampedro.

CD conmemorativo
‘Un lustro de historia’ recompila unha escolma das interpretacións da orquestra universitaria gravadas ao vivo en distintos concertos. Como se destacou na presentación, o CD inclúe varias obras do patrimonio cultural galego como Camiño de Santiago de Henrique Saavedra, única gravación con orquestra sinfónica ata o momento desta obra; o Concerto de violín do pontevedrés Manuel Quiroga; e a Impresión noctura do coruñes Andrés Gaos. Tamén destaca outra obra infrecuente en traballos discográficos como o Trio Sonata para dous violonchelos de Haendel.

Entre os solistas convidados incluídos neste CD figuran Roberto Santamarina, profesor do Conservatorio Profesional de Santiago; Gregory Nedobora, principal de segundos violíns da Real Filharmonía de Galicia; a arpista Reyes Gómez Benito, do conservatorio profesional de música de Badaxoz; Bárbara Switalska e Thomas Piel, principal e tutti; Enrique Roca, Ângela Neto e Guillermo Alzugaray, dous violíns e violonchelo respectamente; o acordeonista Javier Díaz e Carlos García Amigo, violonchelo tutti da Real Filharmonía de Galicia.

Para a elaboración deste disco, o Espazo de Cámara contou colaboración dos técnicos da RTVG Pablo Barreiro e Migués Novás para todas as gravacións realizadas e incluídas no disco así como de AGADIC pola cesión de diferentes partituras de repertorio galego incluídas no seu arquivo.

Concerto de Nadal
A orquestra ofrecerá o próximo domingo 11 o seu tradicional Concerto de Nadal, a partir das 20.00 horas na Igrexa da Universidade con entrada libre ata completar aforo. Baixo a dirección de Mario Diz, o programa do concerto inclúe a Obertura Croesus (R. Keiser), A infancia de Xesús (H. Berlioz), O Voo sobre Exipto, Dream children (E. Elgar), Peer Gynt, suite nº 2, Op. 46 (E. Grieg), Danza Arábiga e Nun mercado persa (A. Ketelby).