A Fundación USC Deportiva organiza un obradoiro de técnicas de relaxación e control do estrés no campus de Lugo

A Fundación USC Deportiva vén de abrir na súa web a inscrición no obradoiro de técnicas de relaxación e control do estrés que se celebrará no campus de Lugo o vindeiro 27 de febreiro.

Este obradoiro de técnicas de relaxación está aberto á participación de todas as persoas interesadas e será impartido polo profesor de tai chi, kung fu e meditación da Fundación USC Deportiva, Amancio Rial, e pola doutora en psicoloxía clínica de Xuntos, Atención Psicolóxica e Psiquiátrica, Patricia Otero. O obxectivo deste obradoiro é o de permitir que as persoas inscritas poidan coñecer cuestións relacionadas co estrés e coa ansiedade, ademais de iniciarse no traballo de dalgunhas estratexias destinadas a manexar o nivel de estrés excesivo, tales como o son as técnicas de relaxación e control dos pensamentos negativos. As persoas interesadas en participar nesta actividade poden inscribirse xa a través da páxina web www.fundacionuscdeportiva.org. O custe da matrícula é de 55 euros por persoa e as prazas ofertadas, que están limitadas a un máximo de 20 participantes, cubriranse por orde de inscrición. As sesións programadas no marco deste obradoiro desenvolveranse o 27 de febreiro, de 16.00 a 20.30 horas, na aula de actividades deportivas da Facultade de Veterinaria do campus de Lugo. As persoas interesadas poden obter máis información ao respecto deste obradoiro na páxina web www.fundacionuscdeportiva.org.