Especialistas internacionais danse cita no 14º Congreso de Antropoloxía en Santiago de Compostela
O Instituto de Ciencias do Patrimonio, do Consello Superior de Investigacións Científicas (CSIC), organiza xunto ás Universidades de Santiago de Compostela, A Coruña, Vigo, Nacional de Educación a Distancia e a portuguesa de Trás-os-Montes e Alto Douro (Portugal) o 14º Congreso da Asociación Internacional de Etnoloxía ( SIEF, polas súas siglas en inglés).
A Cidade da Cultura de Compostela acollerá este domingo 14 ás 18.00 horas a inauguración do simposio que se vai a desenvolver entre os días 14 e 17 de abril na Facultade de Ciencias Económicas e Empresariais da USC e no que se reflexionará sobre temas como a situación da antropoloxía en Galicia, o impacto do turismo ou a recuperación dos barrios.
No acto de apertura participarán a conselleira de Educación, Universidades e Formación profesional, Carmen Pomar; o presidente da Deputación da Coruña, Valentín González Formoso; o delegado institucional do CSIC en Galicia, Antonio de Ron; o vicerreitor de Investigación e Innovación da USC, Vicente Pérez Muñuzuri; a vicerreitora de Oferta Académica e Innovación Docente da UDC, Nancy Vázquez Veiga, e a vicerreitora de Coordinación Académica e Calidade da UNED, Nancy Konvalinka. Intervirán tamén a presidenta deste congreso, Cristina Sánchez-Carretero, e a presidenta da asociación SIEF, Nevena Skrbic Alempijevic.
A continuación terá lugar a conferencia inaugural ‘The politics of evidence in an uncertain world: experience, knowledge, social facts and factual truth’ a cargo de Susana Narotzky, catedrática de antropoloxía social da Universitat de Barcelona, cunha longa traxectoria de investigación en dinámicas socioeconómicas na cidade de Ferrol. Nela falará sobre as políticas económicas da incerteza que se derivan da crise e da posverdade.
Evento de gran transcendencia
O resto de conferencias plenarias serán impartidas por Barbara Kirshenblatt- Gimblett, conservadora xefe do POLIN Museo da historia dos xudeus polacos (Polonia); Regina Bendix, profesora de Etnoloxía europea na Universidade de Göttingen (Alemaña); Dorothy Noyes, especialista en antropoloxía que traballa na Universidade Estatal de Ohio (Estados Unidos); Coppélie Cocq, profesora de Etnoloxía Europea na Universidade de Helsinqui (Finlandia); Sharon Roseman, profesora de Antropoloxía na Memorial Universidade (Canadá), e Tim Ingold, profesor emérito de Antropoloxía Social da Universidade de Aberdeen (Reino Unido).
“Desde a década dos 90 do pasado século non houbo outro evento similar de antropoloxía en España. É unha ocasión moi especial porque se van a reunir figuras de primeira liña internacional neste ámbito”, sinalou esta mañá nun encontro cos medios de comunicación Cristina Sánchez, presidenta da Asociación Galega de Antropoloxía, coordinadora do congreso e investigadora do CSIC no Instituto de Ciencias do Patrimonio.
O congreso, que leva por lema Track Changes: Reflecting on a Transforming World, conta co patrocinio da Xunta de Galicia, a Wenner Gren Foundation, a Deputación de Coruña, as universidades organizadoras e o CSIC, a quen o delegado institucional do CSIC en Galicia quixo agradecer a súa implicación.
Mesa redonda sobre a antropoloxía galega
Preto de 900 especialistas en antropoloxía e disciplinas afíns de máis de 50 países daranse cita nun evento que contará con 90 sesións. Os expertos abordarán temáticas de especial relevancia social, como os movementos migratorios e a crise dos refuxiados, cuestións de xénero, procesos de patrimonialización e consumo turístico na sociedade contemporánea, transformacións do mundo rural, ou temas ambientais relacionados co cambio climático. Realizaranse ao redor de 900 presentacións, entre papers, formatos audiovisuais e pósteres.
Así mesmo, o luns 15 ás 18.30 horas terá lugar unha sesión plenaria especial dedicada integramente á antropoloxía galega e na que haberá unha homenaxe a Carmelo Lisón Tolosana, impulsor dos estudos universitarios de Antropoloxía en España e mestre de varias xeracións de antropólogos españois e estranxeiros. Nesta sesión celebrarase unha mesa de debate moderada por Sharon Roseman, que realizou boa parte do seu traballo de campo en Galicia. Participarán Xaquín Rodríguez Campos, da USC; Antonio García Allut, da Universidade da Coruña, e Xerardo Pereiro, da Universidade de Trás-os-Montes e Alto Douro. O obxectivo, revisar e repensar a situación da antropoloxía en Galicia e analizar as posibilidades futuras da disciplina, xa que segundo sinala a coordinadora do congreso: “O caso galego é especialmente precario debido a que carece de espazos visibles. Na actualidade, só a Universidade Nacional de Educación a Distancia imparte o grao de Antropoloxía”.
Habilitouse ademais un punto morado no que os asistentes poden denunciar calquera tipo de acoso ou violencia machista que se sufra ou da que se sexa testemuña.
Toda a información sobre o congreso pode consultarse na páxina web www.siefhome.org/congresses/sief2019. Hai tamén dispoñible unha app (https://www.eventool.com/es/wa/sief2019) patrocinada pola Deputación da Coruña.
