Filosofía acolle este martes o evento de referencia en Galicia na loita contra a desigualdade
O V Foro de Capacitación sobre pobreza, exclusión social, terceiro sector e voluntariado, cita de referencia en Galicia para a análise das situacións de pobreza e exclusión e a proposta de solución, terá lugar este martes 24 na Facultade de Filosofía organizado pola Rede Galega contra a Pobreza e a Exclusión Social (EAPN Galicia) xunto á Coordinadora Galega ONGD e o Comité de Entidades Representantes de Persoas con Discapacidade (CERMI Galicia).
Entre as actividades a desenvolver, logo da inauguración ás 9.45 horas, figuran un diálogo sobre participación de persoas en risco de pobreza ou exclusión entre Yosehanna Ledesma e Javier Pérez García, de EAPN Galicia, e conferencias sobre os retos na loita contra a pobreza e a exclusión social en España e sobre coordinación entre administracións e organizacións sociais a cargo do presidente de EAPN España e vicepresidente da Plataforma do Terceiro Sector, Carlos Susías, e de Antonio Fernández Moro, da Xunta de Castela e León, respectivamente.
A xornada matinal rematará cunha mesa sobre compromiso e coordinación entre institucións no que participarán as concelleiras de Servizos Sociais de Ourense, Santiago de Compostela, Lugo e A Coruña; o alcalde de Muras, Manuel Requeijo; e a ata agora directora xeral de Familia e Inclusión da Xunta de Galicia, María Amparo González.
Xa pola tarde levaranse a cabo obradoiros sobre a Renda Inserción Social de Galicia (RISGA) e a necesidade de que se regule mediante un Decreto para non provocar retrasos para as institucións e indefensión entre os solicitantes. Tamén haberá sesións sobre inclusión e emprego e sobre a situación da pobreza que afecta ao 53% das familias monomarentais (unha nai con fillo/ a cargo).
Intercambio rápido de propostas innovadoras
Dentro do programa deste quinto foro levarase a cabo ademais unha nova Ágora do Terceiro Sector e Voluntariado, un formato novo que obtivo gran éxito na súa edición pasada e na que oito organizacións sen ánimo de lucro (entre elas a Rede Galega de Cooperación Universitaria ao Desenvolvemento na que participa a USC) e empresas de economía social exporán de maneira breve proxectos innovadores na loita contra a pobreza e a exclusión social.
Trataranse propostas relacionadas co redes de cooperativas sen animo de lucro, saúde mental e sen fogarismo, servizos comunitarios e comercio xusto, banca ética, políticas educativas ou o uso das novas tecnoloxías na loita contra a exclusión social.