Unha investigación realizada na Facultade de Ciencias avanza no desenvolvemento de novas formulacións de tensioactivos
Unha investigación realizada polo mindoniense Lucas Piñeiro Maseda na Facultade de Ciencias do campus de Lugo e recollida na tese de doutoramento ‘Estudo estrutural e dinámico de procesos de asociación supramolecular’, dirixida polos profesores Mercedes Novo e Wajih-Al Soufi, do Departamento de Química Física da USC, avanza no desenvolvemento de novas formulacións de tensioactivos.
Lucas Piñeiro presenta na súa tese de doutoramento un novo modelo matemático para describir a formación de micelas en disolucións de tensioactivos. Esta nova achega permite realizar unha análise cuantitativa moito máis precisa que os métodos convencionais e fai posible obter o valor importante da concentración micelar crítica do tensioactivo independentemente da técnica experimental empregada.
A validez deste modelo matemático para diversos tensioactivos con diferentes características estruturais demostrouse tanto mediante técnicas de fluorescencia e de condutividade eléctrica, como con datos da bibliografía medidos con outras técnicas.
As aplicacións desta nova fórmula son importantes para o desenvolvemento de novas formulacións de tensioactivos, tal e como pode ser o caso da industria de deterxentes. Asemade, este modelo tamén é aplicable á agregación de nano-partículas ou proteínas como o beta-amiloide, responsable da enfermidade de Alzhéimer.
Os resultados da investigación desenvolvida por Lucas Piñeiro e compilados na súa tese de doutoramento supoñen un avance importante e tiveron un grande impacto na comunidade científica internacional, tal e como o proba o feito da publicación destes traballos en revistas internacionais de alto prestixio.
Composición do tribunal e cualificación
O tribunal encargado de avaliar a tese de doutoramento presentada por Lucas Piñeiro Maseda na Facultade de Ciencias da USC estivo presidido polo experto en sistemas coloidales e nano partículas Juan Manuel Ruso Beiras, que é profesor da USC na Facultade de Física.
Pedro Ramos Cabrer, profesor de investigación de Ikerbasque, do Centro de Investigación CIC biomaGune de San Sebastián; Silvia Zorrilla López, científica Titular do Centro de Investigacións Biolóxicas do CSIC en Madrid; Jorge Pérez Juste, profesor do Departamento de Química Física da Universidade de Vigo, e a catedrática María Flor Rodríguez Prieto do Departamento de Química Física da USC, tamén formaron parte do tribunal encargado de cualificar a tese de doutoramento presentada por Lucas Piñeiro e que mereceu a máxima cualificación de sobresaínte cum laude.