Matrícula aberta para os programas de formación para a empregabilidade en Santiago e Lugo

As Áreas de Orientación Laboral dos Campus de Santiago e Lugo manteñen aberta este días a matrícula gratuíta do programa de Formación para a Empregabilidade que desenvolverán no primeiro trimestre deste curso. Trátase de dotar ao alumnado e titulados recentes de instrumentos que lles faciliten a busca de emprego e a incorporación ao mercado laboral.

Está estruturado en dous módulos, un dedicado ás ferramentas e recursos para a busca de emprego e o segundo orientado ás competencias e habilidades profesionais dos/as candidatos/as.

As actividades desta semana en Santiago son o mércores 21, cunha xornada ás 12.30 horas en Ciencias da Comunicación titulada ‘Móvete por Europa: Programa Erasmus Prácticas USC. Rede EURES: Portal Europeo para a Mobilidade Laboral en Europa’. Ese mesmo día pola tarde (16.00 horas en Ciencias Económicas e Empresariais) terá lugar o obradoiro práctico ‘A busca de emprego no Portal Eures e Ferramentas Europass : O CV Europeo, Pasaporte de Linguas (MEC), Pasaporte de Competencias’.

Xa no campus de Lugo haberá tamén o día 21, ás 11.00 horas na Biblioteca Intercentros, unha xornada sobre procesos de selección de persoal na que se achegarán técnicas e ferramentas para enfrontarse mellor a situacións de busca de emprego.