Presentan no ILG os primeiros resultados do Atlas Xeosociolingüístico das comunidades Quilombolas do Nordeste do Pará

O investigador da Universidade Federal do Pará (Brasil) Marcelo Pires Dias presentou recentemente no Instituto da Lingua Galega da USC (ILG) os primeiros resultados do Atlas Geossociolinguístico das comunidades Quilombolas do Nordeste do Pará ( AGQUINPA ) no que está a traballar para a súa tese de doutoramento, que lle dirixe a profesora Marilúcia Barros de Oliveira e está co dirixida polos docentes da USC Rosario Álvarez e Xulio Sousa. O AGQUINPA ten como obxectivo cartografar a variedade lingüística do portugués utilizado nas comunidades quilombolas da rexión nordeste do Pará (Brasil) a través do inventario fonético e do léxico, ademais de elaborar un banco de datos sistematizado para outras pescudas de tipo dialectolóxico. A pescuda insírese na discusión acerca dos vestixios das linguas de matriz africana que sobreviviron no léxico e pretende medir a súa difusión nas comunidades remanescentes de quilombo do Pará. O investigador Marcelo Pires presentou no ILG os primeiros mapas léxicos así coma os fenómenos fonético-fonolóxicos cartografados a través dos mapas fonético-fonolóxicos e a situación actual do proxecto en curso.