O Observatorio Astronómico Ramón Mª Aller impulsa o Mes da Astronomía 2020 na Biblioteca Pública de Santiago Ánxel Casal
O Observatorio Astronómico Ramón Mª Aller da USC impulsa o Mes da Astronomía 2020 na Biblioteca Pública de Santiago Ánxel Casal que se desenvolverá ao longo de outubro. As actividades iniciaranse o vindeiro mércores 14 cun obradoiro infantil de astronomía dirixido a nenos e nenas de 7 a 10 anos. A actividade terá lugar no salón de actos de 18.30 a 19.30 horas. O mércores 21 de outubro, en idéntico horario, celebrarase outro obradoiro infantil de astronomía dirixido, nesta ocasión, a nenos e nenas de 11 a 14 anos.
Tamén o mércores 21, desenvolverase unha actividade de observación do ceo nocturno con telescopio, se as condicións meteorolóxicas o permiten; do contrario, trasladaríase a outro día. A actividade iniciarase ás 20.00 horas no salón de actos cunha breve explicación sobre o que as persoas participantes van poder avistar. A continuación, procederase no exterior da biblioteca á observación dos astros a través do telescopio, cunha duración aproximada dunha hora.
As persoas interesadas poderán recoller a invitación para estas actividades no mostrador de Información da biblioteca a partir das 17.30 horas. O número máximo de participantes nas actividades é de quince persoas.
Coa finalidade de completar este mes astronómico, a Biblioteca ofrece na sala infantil dende o 5 ata o 31 de outubro a mostra bibliográfica ‘Astronomía’ na que amosa os fondos que posúe sobre esta materia para os máis pequenos e pequenas.
Estas actividades enmárcanse dentro do congreso público ‘Astronomía nas rutas xacobeas’ que está impulsando o Observatorio Astronómico Ramón Mª Aller dende xullo cunha morea de actividades en distintos concellos galegos, alén de sesións en León, Burgos e Nájera en A Rioxa. Antes do remate deste mes, haberá outra sesión do congreso en Pamplona. A financiación do congreso acadouse nunha convocatoria pública de Turismo Galicia.