O ministro de Xustiza impartiu a conferencia inaugural das I Xornadas Compostelás de Temas Actuais de Dereito Procesual e Dereito Penal
O reitor Juan Casares, acompañado do ministro de Xustiza, Francisco Caamaño, inauguraron este luns 14 as I Xornadas Compostelás de Temas Actuais de Dereito Procesual e Dereito Penal. Foi no Salón de Actos da Facultade de Dereito, nun acto no que interviñeron ademais o alcalde de Santiago, Xosé Sánchez Bugallo; o decano da Facultade de Dereito, Luis Míguez Macho; e as coordinadoras do curso, Araceli Manjón, da Universidade Complutense de Madrid, e Raquel Castillejo, da USC.
“Convencidos de que o Dereito Penal e o Procesual Penal son disciplinas siamesas”, sinalan as coordinadoras, estas primeiras xornadas nacen con vocación de continuidade encamiñadas, tanto na presente convocatoria como en futuras, a analizar as moi importantes reformas que o Código Penal e a Lei de Enxuizamento Criminal ten experimentado ou están a punto de sufrir. O programa deseñado tamén atenderá os temas máis polémicos que a praxe destas disciplina presenta cada día, como por exemplo a regulación penal do tráfico de drogas ou o novo título de imputación en materia de responsabilidade penal das persoas xurídicas.
O programa do encontro, no que se matricularon máis de 300 estudantes de diversas titulacións e profesionais, arrancou coa conferencia inaugural do ministro de Xustiza, Francisco Caamaño. Xa pola tarde, a partir das 16:00 horas a quenda de intervencións continua cunha mesa redonda sobre ‘A reforma do dereito penal sexual e a proba de ADN’ que modera o fiscal xefe de Galicia, Carlos Varela, e no que interveñen o catedrático da Universidade Carlos III de Madrid Francisco Javier Álvarez, e a catedrática da USC Raquel Castillejo.
Deseguido, a portavoz do CGPJ Gabriela Bravo e a profesora da USC Lourdes Noya interveñen na mesa redonda ‘O tratamento da delincuencia en mozos infractores’, moderadas pola vocal do Consejo General do Poder Judicial Margarita Uria. A partir das 18:30 horas os aspectos penais e procesuais vinculados á dopaxe no deporte centrará as intervencións da catedrática da Universidade de Cantabria Paz de la Cuesta e do profesor da USC Bernardino Varela. Para rematar a sesión inaugural trataranse os ciberdelitos, as investigacións proactivas e as medidas especiais de investigación en relación coa delincuencia organizada.
Na xornada do martes 15, as intervencións abordarán cuestións relacionadas coa privación de liberdade, corrupción e crime organizado en México, responsabilidade penal das persoas xurídicas ou o fracaso da política represiva en drogas e a loita contra o crime organizado.
De esquerda a dereita, Raquel Castillejo, Xosé Sánchez Bugallo, Juan Casares, Francisco Caamaño, Luis Míguez e Araceli Manjón
