O novo equipo de Xerencia da USC, presentado ante o Persoal de Administración e Servizos no Campus Terra

A vicerreitora de Coordinación do campus de Lugo, Montserrat Valcárcel, e o xerente da Universidade da Santiago de Compostela, Xavier Ferreira, reuníronse este martes, no edificio Cactus, co persoal de Administración e Servizos da USC no Campus Terra con motivo da presentación do novo equipo de Xerencia. Nos vindeiros días, o novo equipo tamén será presentado ante o persoal que traballa no campus de Santiago.   

A nova estrutura da Xerencia responde ao compromiso do novo reitor da USC, Antonio López, de profesionalizar a xestión e eliminar cargos asesores e adxuntos nos diferentes ámbitos. Desta forma, o Xerente estará asistido nas súas funcións por distintas Vicexerencias, asumindo Delfín Pérez, a Vicexerencia do Campus de Lugo e Servizos. Ademais, Pilar Martínez ocupará a Vicexerencia de Persoal, Investigación e Planificación Estratéxica; mentres que na Vicexerencia de Economía e Infraestruturas sitúase Xosé Antón Freire; e na de Xestión Académica, Francisco Colomer.

Todas as Vicexerencias serán desempeñadas por persoal funcionario de Administración e Servizos da Universidade de Santiago de Compostela, con experiencia en distintos postos de responsabilidade das áreas académica, económica e de investigación.

Ferreira aposta por reforzar a presenza da Xerencia no Campus Terra, neste senso, a Vicexerencia do campus de Lugo será a encargada de coordinar os Servizos Universitarios no seu conxunto, desenvolvendo, polo tanto, un rol relevante en ambos os dous campus.

O vicexerente do campus de Lugo e Servizos, Delfín Pérez (Ourense, 1967) ocupou nos últimos 10 anos postos de responsabilidade na xestión de centros, na área económica e de investigación. Entre os anos 2010 e 2014, e desde 2016 á actualidade, desempeñou o posto de Xefe do Servizo de Axudas e Servizos ao Alumnado, na área académica e de servizos á comunidade universitaria.