Este estudo enmárcase nas actividades que a USC, a través da Oficina de Igualdade de Xénero (OIX), vén desenvolvendo en colaboración co Plan Corresponsables da Secretaría de Estado de Igualdade e contra a Violencia de Xénero do Ministerio de Igualdade e coa Dirección Xeral de Promoción da Igualdade da Xunta de Galicia.
O Estudo sobre corresponsabilidade entre a comunidade estudantil da USC presenta os resultados sobre os factores, comportamentos e valoracións do conxunto de estudantes da USC sobre diferentes dimensións da corresponsabilidade.
Obxectivos:
Recoller a valoración e a percepción do estudantado da USC respecto das dinámicas de traballo doméstico e familiar, en relación aos modelos de fogares nos que residen.
Analizar os diferentes tipos de traballos realizados e de xestión de coidados (emocionais e físicos) que asumen mulleres e homes e a valoración sobre o reparto de responsabilidades.
Identificar necesidades e propostas en materia de promoción da igualdade de xénero
Metodoloxía:
Cuestionario electrónico
Universo: estudantado da USC do Campus de Lugo e Santiago. Total 25.258 estudantes.
Total repostas: 463 entrevistas.
Traballo de campo: do 6 ao 31 de maio de 2025
Modelo de cuestionario:
Preguntas sociodemográficas.
Caracterización da residencia durante o curso e responsabilidade nas tarefas do fogar.
Caracterización do fogar das persoas que viven en parella.
Fogar de crianza. Reparto do traballo remunerado nas persoas adultas.
Valoración do nivel de corresponsabilidade.
Valoración global de factores de corresponsabilidade. Valoración dos tempos dedicados a diferentes actividades. Importancia da corresponsabilidade.
Coñecemento e valoración das medidas de corresponsabilidade da USC
Conclusións:
A xeración do estudantado entrevistado manifesta o seu compromiso coa corresponsabilidade e valora positivamente a experiencia de convivencia na vivenda de residencia durante o curso académico.
A gran maioría do estudantado comparte vivenda con persoas da mesma xeración e resulta máis fácil o reparto das tarefas ao estar establecidas dinámicas de convivencia máis flexibles que no fogar ou residencia familiar. Porén as mulleres sinalan maior dedicación que os homes na realización de actividades de limpeza e aos estudos e indican dispor de menos tempo para a vida persoal que os homes.
O fogar de crianza do estudantado caracterízase por un modelo no que ambos proxenitores, nai e pai, traballaban fóra. Un modelo que as mozas e mozos enquisados cuestionan ao entender que o reparto das responsabilidades domésticas non eran compartido e no que as mulleres, nais, desenvolvían a maior parte do traballo non produtivo.
Mozas e mozos mostran a súa inquietude por acadar unha maior implicación e participación nas tarefas domésticas e din que poderían facer máis. A falta de tempo ou e ausencia da referencia dunha persoa adulta que lles indique que facer son as escusas que poñen para non implicarse e participar de forma máis activa no fogar.
A ausencia de responsabilidades familiares, de coidado de menores e os poucos casos de convivencia en parella do estudantado, entre outros, non axudan a identificar dificultades de conciliación e de corresponsabilidade coa mesma intensidade que se manifesta na poboación adulta.