Nos programas de voluntariado, a USC ofrece a posibilidade de adquirires unha experiencia única participando nun proxecto dunha entidade social en Santiago, en Lugo ou noutras localidades.
As actividades de voluntariado contan con horarios flexibles e a colaboración establécese de xeito individual, atendendo á dispoñibilidade persoal e ás necesidades do programa no que se queira participar.
Neste momento está pechado o prazo de inscrición para colaborar con moitas entidades ata que confirmen se manteñen os mesmos programas ou hai cambios nas prazas ou horarios.
Irase actualizando a páxina ao longo do mes de setembro e só poderás inscribirte cando estea habilitado o formulario de inscrición para colaborar con cada unha.
Desenvólvense actividades en diferentes ámbitos: inclusión social, saúde, atención á diversidade, comunidade universitaria, educación, menores, persoas maiores, medio ambiente, cultura, entre outras…
Débese ter en conta tamén que nos programas de voluntariado con menores é necesario ter un certificado de carencia de delitos de natureza sexual.
Durante todo o curso académico; hai determinadas actividades que dan preferencia a aquelas persoas que inician a súa colaboración en outubro ou en febreiro, podendo facer axustes para poder adaptala ao curso académico universitario.
Todas as actividades nas que se pode participar reforzan a adquisición de competencias transversais, axudan a enriquecer o currículo e contan con recoñecemento académico. Pódense recoñecer ata 6 créditos optativos por actividades de participación social e voluntariado en todas as titulacións de Grao.
O recoñecemento académico das actividades realízase en función do número de horas realizadas no programa de voluntariado. En calquera caso o primeiro crédito optativo é o resultado de sumar os módulos de formación básica (10 horas) e as horas de voluntariado realizadas durante o curso académico. Un crédito optativo equivale a 25 horas.
Os módulos de formación básica realízanse en modalidade de autoformación. A primeira parte consta de dous módulos, un común de carácter introdutorio e outro específico, que son avaliados a través de cuestionarios tipo test. Na segunda parte é necesario realizar dúas tarefas, un comentario sobre un tema proposto e unha memoria sobre a actividade voluntaria. Cada unha das tarefas debe ter unha extensión mínima de 1000 palabras para ser avaliada. Para solicitar o certificado de recoñecemento académico é necesario ter superado todas as tarefas e estar rexistrado no servizo na convocatoria vixente.
Todo o alumnado de grao conta coa posibilidade de solicitar recoñecemento académico cando participe durante un semestre, sempre e cando a temporalidade da actividade así o permita. De igual xeito, todas as persoas inscritas poden solicitar un certificado cando finalicen o seu voluntariado.
Servizo de Participación e Inclusión Universitaria
- SEPIU. Pavillón de Estudantes
- Rúa de Lope Gómez de Marzoa, 4. Campus Vida , 15782Santiago de Compostela
- 881 812 859
- 881 812 858
- sepiu.santiago [at] usc.gal
Servizo de Participación e Inclusión Universitaria
- SEPIU. Edificio Intercentros
- Rúa Bernardino Pardo Ouro, s/n. Campus Universitario, 27002Lugo
- 982 823 594
- sepiu.lugo [at] usc.gal
Novas relacionadas
Un proxecto de alumnado da USC sobre a comunidade albina de Mozambique, candidato aos XI Premios ao Voluntariado Universitario
En febreiro coñeceranse os oito proxectos gañadores, aos que a Fundación Mutua axudará con 50.000 euros
Ler máisCiencias da Comunicación e a Unidade de Atención Psicolóxica da USC suman forzas a prol da saúde mental
Unha serie de vídeos que se difundirán a través da rede social Instagram inclúen consellos para facer fronte aos exames de xeito saudable
Ler máis