A USC achégase a estudantes de ESO e bacharelato cun campus estival que se desenvolverá do 23 ao 27 de xuño en Lugo

A USC achega a vida universitaria a estudantes de ESO e BAC a través dun campus estival que se desenvolverá do 23 ao 27 de xuño na sede universitaria luguesa, onde os/as rapaces/as matriculados/as poderán participar en diversos obradoiros educativos e divulgativos relacionados en maior ou menor medida coas titulacións impartidas ou coas liñas de investigación que se desenvolven ou nas que están a traballar no campus de Lugo.

O campus de verán científico técnico Lugo, un programa pioneiro en Galicia organizado e promovido polo profesorado desta sede universitaria da USC, antóllase como unha gran oportunidade para que estudantes de ensino secundario e bacharelato sexan protagonistas reais dunha experiencia universitaria única e coñezan, a través dun ameno programa de aprendizaxe e convivencia, as múltiples oportunidades que ofrece o ensino e a convivencia universitaria. O campus de verán científico técnico, que nesta segunda edición ofrece un total de 90 prazas, mantén aberto o seu prazo de inscrición ata o vindeiro domingo, día 11 de maio. Ata o momento, os promotores deste programa de promoción universitaria no que participan preto duns 80 docentes, contabilizaron xa preto dun centro de solicitudes de candidatos procedentes de diversas localidades galegas e de fóra de Galicia. Unha das novidades desta edición do campus de verán científico técnico Lugo, vén dada pola oferta de servizo de aloxamento en Lugo, unha alternativa aberta a todos/as os/as interesados/as, pero pensada para atraer a participantes procedentes de distintas localidades e fomentar así a convivencia e o intercambio de experiencias e inquedanzas entre mozos e mozas, que poderán compartir as súas vivencias no Albergue Lug2, baixo a supervisión de monitores titulados/as da A.D.C. Lumieira Lugo. Os obxectivos deste programa son os mesmos que propiciaron a súa posta en marcha e pasan por divulgar e achegar ao estudantado preuniversitario as titulacións científicas, técnicas e de ciencias sociais e Humanidades, así como a investigación desenvolvida nos distintos centros do campus de Lugo. Dar a coñecer a ciencia e a tecnoloxía desenvolvida na sede universitaria luguesa mediante a organización de talleres e o desenvolvemento de proxectos científicos e técnicos que teñan como protagonistas aos estudantes de ESO e Bacharelato, ademais de achegar toda a información dispoñible para que os futuros universitarios/as poidan elixir mellor o seu futuro e divulgar a investigación feita no campus de Lugo son outros dos cometidos deste programa, en cuxo financiamento colaboran o Concello e a Deputación de Lugo, así como da Fundación Barrié, a través de educaBarrié. Programa, escenarios e actividades As distintas actividades incluídas no II Campus de Verán Científico Técnico Lugo desenvolveranse en quenda de mañá e tarde, en horario de 9.30 a 18.00 horas, nas facultades de Ciencias, Humanidades e Veterinaria, así como na Escola Politécnica Superior de Lugo. As visitas aos distintos laboratorios de investigación e servizos do campus de Lugo e a centros colaboradores (Biblioteca, CACTUS, Aula de Produtos Lácteos e laboratorio de Sanidade e Produción Animal de Galicia), e a realización de actividades prácticas e de talleres relacionados coas titulacións científicas e técnicas do campus de Lugo centran as actividades programadas polos organizadores do campus en quenda de mañá. Polas tardes, os/as alumnos/as inscritos/as no programa, repartidos en grupos pequenos, desenvolverán, baixo a tutela do profesorado universitario, distintos proxectos científicos ou técnicos a elixir entre máis de 20 propostas. Ofrécense ademais un “Quest” en inglés, un espectáculo científico, un encontro con ex alumnos/as, unha festa de despedida e algunha sorpresa máis. Inscrición e matrícula O prazo de inscrición estará aberto ata o 11 de maio a través da páxina web www.usc.es/gl/cursos/campcientec , un enderezo electrónico no que tamén poderán atopar toda a información relativa ao desenvolvemento do campus. Os candidatos/as admitidos/as serán informados por e-mail coas indicacións para realizar a matrícula entre o 15-21 de maio. A matrícula no campus (sen aloxamento) ten un prezo de 40 E e inclúe participación nas actividades conxuntas do campus e nun dos proxectos científicos ou técnicos, material necesario para o campus, seguro, xantar nun comedor universitario os cinco días do campus, e diploma de participación da Universidade de Santiago de Compostela. O Campus (con aloxamento) custa 120 E e inclúe todo o anterior máis actividades lúdicas, aloxamento, cea e almorzo no albergue Lug2, con acompañamento de monitores titulados da A.D.C. Lumieira Lugo. Proxectos científicos e técnicos a desenvolver O estudantado que tome parte no I Campus de Verán Científico Técnico Lugo terá a ocasión de ser protagonista de diversos proxectos científicos e técnicos que versan sobre áreas de coñecemento moi diversas. Así, as propostas feitas desde a Facultade de Veterinaria levan por título Prácticas de veterinaria clínica; Animal CSI, realidade ou ficción?; As análises clínicas como forma de saber o estado de saúde dos animais; Separación de proteínas mediante electroforese; Animais diminutos nas praias galegas: a vida entre os grans de area; Inseminación artificial en veterinaria e Unha cebra na auga. A multiplicación de árbores por cultivo in vitro, A importancia de saber por onde pisas, onde constrúes, A modelaxe 3D e medicións mediante fotogrametría, A auga que levan os ríos sempre está cambiando, como medila?, A enerxía do futuro: simulación dun convertedor de enerxía das ondas mariñas e Medición e valoración de arboredo constitúen as propostas científicas que ofrece a Escola Politécnica. Un abano de proxectos non menos atractivo é o deseñado polo profesorado da Facultade de Ciencias, que desenvolverá seis experiencias científicas e técnicas que levan por título Química computacional, a química no teu ordenador; A cor: pigmentos naturais; Sulfato de cobre: preparación dun funxicida ecolóxico e protección de ferro por cementación; Produción de electricidade cunha froita; Do laboratorio á cociña e Luz, cor e fluorescencia. Outra das novidades que presenta o programa este ano atinxe á oferta de proxectos nos que a ciencia convive coas humanidades e a creación artística. Así, desde a Facultade de Humanidades propóñense os proxectos Os científicos das letras: ‘Elemental, querido Watson’ o programa en inglés ‘English, Science and Fun’ ou un obradoiro de introdución á fotografía científica que se desenvolverá na Facultade de Veterinaria baixo o título ‘Fai as túas fotos e mellóraas!’. Actividades desenvolvidas na primeira edición do campus de verán científico técnico