A Aula Tic Pemes da USC e Cogami promoven un curso de habilidades empresariais para persoas con discapacidade física

A Aula Tic Pemes da USC promove en colaboración con Cogami un curso de experto en desenvolvemento de habilidades empresariais orientado á participación de persoas con discapacidade física recoñecida e carentes de estudos superiores en xestión empresarial.

Esta actividade formativa impulsada pola Aula Tic Pemes da USC ao abeiro do proxecto Edison procura favorecer a inserción e a integración de persoas en risco de exclusión, tal e como poden ser as que teñen algún tipo de discapacidade física, a través do emprego, segundo sinalou a profesora da USC e directora da Aula Tic Pemes da USC, Ángeles López Cabarcos.

O programa do curso de experto en desenvolvemento de habilidades empresariais está estruturado en 240 horas e desenvolverase de xeito parello ao curso académico desde novembro de 2019 ata xuño de 2020. O curso inclúe un período de formación presencial de 80 horas, cuxas clases serán impartidas por persoal da Aula Tic Pemes na Facultade de Administración e Dirección de Empresas do campus de Lugo. Unha vez rematada esta fase de aprendizaxe, o alumnado poderá gozar dunha estadía de prácticas laborais durante 160 horas en empresas e institucións adheridas a esta iniciativa.

As persoas, empresas e entidades interesadas en sumarse a este proxecto a prol da inserción social de persoas en situación de desemprego e risco de exclusión poden solicitar máis información sobre o desenvolvemento deste programa e respecto do apadriñamento de alumnos e alumnas a través do enderezo de correo electrónico atpemes [at] usc.es (atpemes[at]usc[dot]es)