Os retos do novo Espazo Europeo de Educación Superior analízanse este venres nas XVII Xornadas da Asociación de Economía da Educación
Os máis importantes expertos de España en asuntos educativos danse cita este xoves e o venres 11 na Facultade de Económicas de Santiago para reflexionar e tentar chegar a acordos sobre a orientación de políticas educativas e de emprego. As XVII Xornadas da Asociación de Economía da Educación (AEDE) é tamén un punto de partida importante para a reflexión dos estudos de economía e empresa así como do novo Espazo Europeo de Educación Superior (EEES).
Neste senso, o venres 11 ás 12:00 horas está prevista unha mesa redonda sobre os novos retos do EEES que moderará o profesor Luis Caramés, presidente da Organización de Economistas de Educación do Consejo General do Colexio de Economistas de España. Participarán neste debate o catedrático de Enxeñaría Química da Universidade da Coruña e ex director da Axencia para a Calidade do Sistema Universitario de Galicia (ACSUG), Eugenio Muñoz, e a decana da Facultade de Ciencias Económicas e Empresariais, Maite Cancelo.
As xornadas inauguráronse este xoves nun acto ao que asistiron o presidente do Consello Social da USC, Manuel Puga; o director da ACSUG, Julio Abalde; o vicerreitor de Economía e Financiamento, Miguel Vázquez Taín; o presidente da AEDE, José Sánchez Campillo; e a decana da Facultade.
As xornadas de Economía da Educación, que se celebran dende 1992 en distintos puntos do territorio español e que nesta ocasión se enmarcan no 40 Aniversario da Facultade de Ciencias Económicas e Empresariais de Santiago, contemplan varias conferencias e numerosas sesións paralelas entre as que destaca unha dedicada á inmigración e á relación co mercado de traballo en base á súa formación educativa.
A AEDEA AEDE agrupa a profesionais que traballan en economía da educación xunto con outros expertos que o fan en campos próximos como socioloxía da educación ou política educativa. As actividades da asociación céntranse no entorno académico e de profesionais do ámbito da xestión e a administración educativa. Na actualidade, a AEDE ten máis dun centenar de socios, sendo unha das asociacións máis activas no campo educativo dende a perspectiva económica.
Ademais do seu encontro anual, a AEDE posúe unha lista de correo electrónico (ECONEDUC) de grande utilidade para o intercambio de información, incluíndo unha gran proporción de profesionais latinoamericanos. A descrición da lista pódese atopar en http://www.rediris.es/list/info/econeduc.html