Veterinaria estende a formación desde as aulas ás explotacións gandeiras
A Facultade de Veterinaria do Campus de Lugo a USC estende a formación do seu alumnado desde as aulas, laboratorios e demais instalacións universitarias ata as cuadras das explotacións gandeiras, xa a través de visitas a explotacións particulares ou ben mediante acordos de adhesión para usos académicos de instalacións de carácter público como o son o Centro de Recría de xatas de vacún de leite, a Granxa Gayoso-Castro ou a futura Granxa Experimental do Campus Terra, dotacións todas elas propiedade da Deputación Provincial de Lugo que, apenas no primeiro mes de curso, xa recibiron a visita de 115 estudantes do segundo curso de grao en Veterinaria que están a cursar a materia Produción Animal I.
Esta formación de marcado carácter práctico antóllase vital para os futuros veterinarios, salienta o profesor Ignacio García Lara, quen precisa que ao redor do 90% dos rapaces e rapazas que están a cursar o grao de Veterinaria en Lugo nunca estiveron nunha explotación de vacún, cando “é imprescindible coñecer o medio no que van desenvolver o seu traballo no futuro”, subliña.
O coordinador das prácticas da materia Produción Animal I xunto co tamén docente Ramiro Fouz, relatou que os máis de 100 estudantes que pasaron ao longo do mes de outubro e distribuídos en grupos de entre 15 e 20 persoas polas instalacións do Centro de Recría de Castro, completaron visitas a todas as dependencias do centro guiados polo seu xerente, o tamén veterinario Rogelio Grille. Así, acompañado tamén polos docentes universitarios, o alumnado tivo a oportunidade de coñecer como se xestiona e desenvolve o proceso de cría e recría de xatas de vacún de leite nunhas instalacións novas e de referencia a nivel nacional.
Coñecer de primeira man as peculiaridades do manexo e da alimentación das novillas de vacún de leite, que anos despois se convertirán en nodrizas produtoras, repercute na mellor formación dos futuros veterinarios, reitera García Lara, ao tempo que indica que a actual conxuntura propiciada pola pandemia dificulta ofrecer este tipo de experiencias de carácter práctico ao alumnado.
O Centro Recría Castro opera desde hai dous anos como unha concesión da Deputación Provincial de Lugo que xestiona a cría das xatas para ser as futuras vacas de leite nas ganderías da provincia de Lugo. Na actualidade, as súas instalacións rexistan un nivel de ocupación de preto do 100 %, o que supón un total de 2.700 animais, distribuídos en distintos lotes homoxéneos. Este modelo organizativo e de xestión permite axustar a alimentación e o manexo dos animais en función das distintas necesidades de cada etapa de crecmento, di García Lara.
