A Escola Politécnica Superior do Campus Terra celebra “o éxito” que supón perdurar 50 anos
A Escola Politécnica Superior do Campus Terra da USC celebrou este luns os 50 anos da implantación dos estudos de Enxeñaría Agrícola en Galicia, unha efeméride que coincide tamén co cincuentenario das orixes do centro universitario lugués, no transcurso dun concorrido acto que serve para constatar que ao longo destas cinco décadas se fixeron moitas cousas ben, pois “o feito de perdurar no tempo é un indicativo de éxito”, dixo o reitor da USC, Juan Viaño, para logo engadir que “hoxe xa nos coñecen alén do campus e de Galicia, e xa saben que esta Escola Politécnica Superior do Campus Terra da USC é un referente na xeración de coñecemento nos eidos agrogandeiro e forestal”.
Agradecido a todas as persoas que ao longo do último medio século contribuíron dun ou doutro xeito a facer da Escola Politécnica Superior do Campus Terra da USC o que é hoxe en día, Viaño salientou que “o que estamos a festexar nesta data sinalada é a capacidade deste centro universitario para favorecer o nacemento de empresas innovadoras como Innolact, que xera máis dun centenar de empregos na comarca luguesa e exporta materia prima de Lugo por todo o mundo, así como o feito de captar a atención de empresas como Capsa Foods e doutras empresas punteiras para o desenvolvemento de diversos proxectos, ou tamén o feito de que Fundación La Caixa outorgue unha das prezadas bolsas de formación a unha enxeñeira formada e titulada nesta escola como é o caso de Susana López”.
A intervención do reitor da USC serviu de clausura dun acto non exento de emotividade, no que Julio Ulloa Vence e María Inés Vázquez Fernández, profesor e alumna das primeiras promocións de estudantes de enxeñaría agrícola na sede da vella Escola de Comercio de Lugo, relataron algunhas das súas lembranzas daquela época. “A implantación da Enxeñaría Agrícola en Lugo e a posterior creación da Escola Politécnica Superior supuxeron a verdadeira transformación de Lugo en cidade universitaria”, sinalou Ulloa Vence, mentres que Inés Vázquez non dubidou en reafirmar esta consideración ao indicar que “os estudos de enxeñaría agrícola e a Escola Politécnica Superior sentaron en Lugo as bases do auténtico e principal campus de Galicia especializado nos ámbitos agrario, forestal e gandeiro”.
A conselleira de Medio Rural da Xunta de Galicia, Ángeles Vázquez, manifestouse neste mesmo senso, ao lembrar que ao longo destes 50 anos, a EPS formou centos de homes e mulleres que teñen participado na modernización da agricultura, da gandería e do sector forestal. Pero “este cometido non está rematado, pois Galicia necesita da actuación agroforestal para equilibrar e conservar o territorio, para garantir a economía e o futuro, para apoiar a cultura, o turismo, a paisaxe e mesmo a nosa gastronomía. Para acadar estas metas, son precisos técnicos formados para poder intervir nunha nova agricultura máis moderna e sustentable”, engadiu.
O director da Escola Politécnica, Tomás Cuesta García, defendeu na súa intervención que a “Escola Politécnica Superior do Campus Terra da USC mantén os obxectivos que xa se perseguían hai medio século e que pasan pola formación de técnicos e polo desenvolvemento de proxectos de investigación que contribúan e mellorar o grao de benestar das persoas que viven no medio rural, así como á conservación do medio natural e a xeración de riqueza e valor engadido”.
A alcaldesa de Lugo, Lara Méndez, tamén formada na xa extinta Escola Universitaria de Enxeñeiros Técnicos Agrícolas (Euita), fixo fincapé na fonda pegada que ten deixado en Lugo a Enxeñaría Agrícola, ao tempo que, logo de felicitar a todos os enxeñeiros agrícolas e agrónomos pola festividade do seu patrón, San Cidre, convidou a ollar o futuro como “unha nova oportunidade”, un desexo que tamén fixo seu o deputado provincial Pablo Rivera Capón, que reiterou o apoio da Deputación Provincial de Lugo á USC e ao seu Campus Terra de Lugo.
O presidente da Interprofesional Láctea (InLac), José Armando Tellado, ofreceu nesta sesión un relatorio baixo o título ‘O futuro da industria alimentaria nun mercado global: o caso do sector lácteo’, unha intervención na que remarcou “os efectos derivados da implantación de sistemas de cotas de produción de leite, aínda que puxo o acento nas posibilidades reais de éxito que lle agardan ao sector leiteiro galego”.
O acto conmemorativo do primeiro século da implantación dos estudos de Enxeñaría Agrícola en Galicia congregou este luns na Escola Politécnica alumnos, docentes, enxeñeiros e enxeñeiras xa egresadas, ademais de responsables políticos e académicos, profesionais en exercicio e representantes empresarias. O Subdelegado do Goberno en Lugo, Ramón Carballo; os deputados provinciais Lino Rodríguez Ónega e Elena Candia, o delegado da Xunta en Lugo, José Manuel Balseiro, así como varios edís da corporación municipal de Lugo e mandos das forzas armadas estaban entre o público asistente, entre o que tamén se atopaba a Adxunta á Presidenta de El Progreso e membro do Consello Social da USC, Blanca de Cora, e Carlota López, de Aresa.