“O Camiño é a primeira marca de Galicia e favorece múltiples empresas”, afirma a CEO da SA de Xestión do Xacobeo
“O Camiño de Santiago é a primeira marca de Galicia, favorece o xurdir de múltiples iniciativas empresariais relacionadas e xera o 11% do PIB autonómico”, sinalou este mércores a CEO da Sociedade Anónima de Xestión do Xacobeo, Cecilia Pereira Marimón, na lección inaugural de apertura de curso na Facultade de Administración e Dirección de Empresas do Campus de Lugo, unha intervención que se desenvolveu baixo o título ‘O Camiño de Santiago e o Xacobeo 21-22’.
O vicerreitor de Organización Académica e Campus de Lugo, Francisco Fraga; o decano da Facultade de ADE da USC, Roberto Bande Ramudo, e a profesora do citado cnetro universitario e integrante da súa comisión de Xénero, Paula Vázquez, tamén participaron neste acto institucional de apertura de curso, unha sesión que tamén serviu para dar a benvida ao novo alumnado matriculado nos graos en ADE e Empresa e Tecnoloxía.
A intervención de Cecilia Pereira serviu para afondar na dimensión transversal xa acadada polo Camiño de Santiago, “o primeiro itinerario cultural europeo”, salientou, para logo engadir que esta ruta cultural é tamén a primeira das 38 actualmente recoñecidas en Europa”.
A dimensión social, económica, turística e tamén a súa fonda influencia en cuestións demográficas, como é a fixación da poboación e, entre outras, a súa contribución ao progresivo despoboamento das áreas rurais, constitúen, na opinión de Cecilia Pereira, algúns dos múltiples efectos positivos que reporta o Camiño de Santiago a Galicia e á súa sociedade. A CEO da SA Xestión do Xacobeo tampouco dubidou en sinalar o Camiño de Santiago como o principal responsable de que Galicia reciba cada ano visitantes chegados de 180 países dos distintos continentes.
