119. A RAG no seu labirinto... de anémonas

Despois de case 120 precisións, son xa moitas as veces en que tratamos problemas que se vían agravados polas contradicións existentes entre dicionarios e vocabularios galegos. Pero que sexa a propia RAG quen se leve a contra a si mesma, xa parece un pouco excesivo.

Se intentamos saber cál debe ser o nome galego culto das especies botánicas do xénero Anemone (en Galicia representado por estas dúas especies) ou dos cnidarios antozoos do xénero Anemonia (fundamentalmente a Anemonia viridis) atoparémonos con que os traballos que deberían contribuír a asentar unha forma preferente son os que máis fomentan a confusión:

En 1997 o Diccionario da RAG, recomendaba o emprego de anémona, apostando por valorar máis a harmonización co castelán e o portugués, ca o respecto á fonte grecolatina da que procede o nome. Esa mesma é a recomendación que sete anos (2004) despois se podía atopar no Dicionario castelán-galego da RAG.

Pero nese mesmo ano 2004 o Vocabulario ortográfico da lingua galega (VOLG) marcaba anémona como forma non normativa, e recomendaba usar no seu canto anemone, dándolle a volta á priorización de criterios que acabamos de indicar.

A maior parte dos dicionarios galegos, tanto xerais como especializados, optaron por unha actitude máis pragmática, e recoñecen as dúas formas como válidas. Podemos comprobalo no Dicionario de galego da Ed. Ir Indo, no Gran dicionario Século XXI galego-castelán, castelán-galego ou no Diccionario das ciencias da natureza e da saúde.

A esta filosofía adhírese tamén a versión que do VOLG se pode consultar na Internet. Nela, recóllese a forma anémona como correcta, e preséntase anemone como sinónimo seu; pola contra, na entrada anemone non hai referencia ningunha ao que debería ser o seu sinónimo.

Chegados a este punto, e dado que neste caso os criterios etimolóxico e de harmonización nos levan a resultados contrapostos, parécenos razoable defender que as dúas denominacións (anémona e anemone) se consideren variantes correctas en galego. Pero iso non quita para pedirlle á RAG unha pouca máis de coherencia -ou de información- á hora de establecer os seus criterios. Non vos parece?