A USC suma 9 medallas no XIX Campionato Galego Universitario de Deportes Colectivos, no que participaron uns 250 estudantes

Uns 250 estudantes das tres universidades galegas participaron este martes e mércores na décimo novena edición do Campionato Galego Universitario de Deportes Colectivos, un torneo organizado pola USC e cuxas probas das distintas modalidades de competición se desenvolveron nos campus de Compostela e Lugo. Os distintos equipos que representaron á institución académica compostelá neste campionato galego universitario saldaron a súa participación no torneo con catro medallas, logo de proclamarse campións de baloncesto nas modalidades masculina e feminina, así como na competición de fútbol sala e de voleibol masculino. A USC acadou a segunda praza no torneo feminino de voleibol e rematou en terceira posición na competición feminina de fútbol sala. Asemade, nas probas deportivas celebradas en Compostela, os equipos masculino e feminino de balonmán da USC remataron na segunda posición, a mesma praza na que rematou o equipo masculino de rugby. Os enfrontamentos dos distintos equipos inscritos para tomar parte nos campionatos de balonmán, rugby 7, fútbol 7 feminino e fútbol 11 tiveron lugar nas instalacións deportivas existentes en Compostela, mentres que as competicións masculina e feminina de baloncesto, voleibol e fútbol sala desenvolvéronse este mércores en distintas instalacións deportivas da capital luguesa. A vicerreitora de Servizos Universitarios do campus de Lugo, Carme Silva Domínguez, presidiu a entrega de trofeos os gañadores/as das distintas modalidades deportivas desenvolvidas en Lugo, no marco dun acto celebrado na Facultade de Veterinaria e no que tamén estiveron presentes os responsables dos Servizos de Deportes das tres universidades galegas. Carme Silva, no centro, con responsables dos servizos de deportes das tres universidades galegas