Un curso mostrará as particularidades da fotografía da natureza

A Fundación USC Deportiva organiza a segunda edición do Curso de Fotografía da Natureza a celebrar os días 18, 20 e 25 de outubro. A intención é que as persoas afeccionada a saír ao monte coas súas cámaras, coñezan as pautas básicas da fotografía de natureza, dende a fotografía de paisaxe á de plantas e animais. Sempre a través de imaxes, ensinaranse as técnicas máis utilizadas polos fotógrafos de natureza, das cales algunhas se poderán aplicar na próxima saída que fagan ao monte e outras, as máis complicadas de aplicar por cuestión de equipo ou dificultade, que se ben non se utilizarán nun primeiro momento, serviranlle para entender como se fan as imaxes que se ven a diario en revistas ou Internet. O curso contará cunha sesión teórica na que se revisarán as principais técnicas e diferentes tipos de fotografías da natureza, preparando deste xeito a saída de campo a celebrar na segunda sesión, unha ruta guiada por persoal especializado co obxectivo de aplicar todas as técnicas posibles das vistas na xornada de teoría. Para completar o período formativo procederase á visualización das imaxes captadas por cada alumno/a. O temario do curso constrúese a partir dun bloque temático de introdución, con referencia ás características xerais do concepto de fotografía de natureza e tomando como referencia a experiencia e coñecemento do alumnado. Completarase tratando cuestións relativas á paisaxe, a fotografía da fauna, técnica de achega aos animais, tipoloxía de animais, vestiario e equipo a utilizar, o emprego do macro e as particularidades da vexetación. O curso impartirano Andrés Fraga, quen leva máis de 10 anos traballando como fotógrafo profesional en publicacións como El Pais e para varias revistas estranxeiras. Compaxina o seu traballo coa docencia, impartindo cursos e conferencias, ademais de ser profesor de Fotografía Contemporánea na Facultade de Ciencias da Comunicación da USC. Foi un dos membros do proxecto 6MPasos, que en 2010 percorreu a pé os 6.000 quilómetros que separan o Nordkapp (Noruega) de Compostela. Para acadar máis información, as persoas interesadas poden dirixirse á web da Fundación USC Deportiva (http://fundacionuscdeportiva.org/).