Favorecer a participación das persoas con diversidade funcional no ensino superior, tema central dun dos cursos de verán da USC

Favorecer o coñecemento e a participación das persoas con diversidade funcional no ensino superior é o obxectivo do curso de verán ‘Universidade e discapacidade: descubrindo capacidades e xerando futuro’ que a USC vai celebrar entre os días 8 e 11 na Facultade de Ciencias da Comunicación.
Os participantes neste encontro traballarán no desenvolvemento de actitudes axeitadas que faciliten a inclusión e na adquisición das habilidades básicas para a actuación para, deste xeito, desterrar estereotipos sobres as capacidades e demandas das persoas con necesidades especiais.
Ademais, o curso permitirá propoñer un espazo de reflexión e análise sobre as implicacións que a promulgación do Real Decreto 1393/2007, de 29 de outubro,de ordenación das ensinanzas universitarias oficiais supón de cara ás necesidades de adaptacións curriculares, deseño de itinerarios formativos ou estudos alternativos para a inclusión de estudantes con necesidades específicas derivadas dunha discapacidade.
En definitiva, trátase de reflectir a responsabilidade social que ten a Universidade nos procesos de sensibilización e dinamización relativos á discapacidade e de reforzar a comunicación e a cooperación con todos os axentes vinculados a este ámbito.

Xunto ás conferencias de expertos universitarios e representantes de entidades especializadas neste ámbito de intervención social, o programa inclúe diversos talleres nos que se afondará no desenvolvemento de normas de actuación específicas para persoas con discapacidade motriz, visual ou auditiva.